Dowladda Federaalka Soomaaliya ayaa si rasmi ah u daahfurtay Istiraatiijiyadda Caafimaadka Qaran ee Bulshada, taas oo ah qorshe ballaaran oo loogu talagalay in lagu horumariyo, laguna casriyeeyo adeegyada daryeelka caafimaadka aasaasiga ah ee dalka sanadaha soo socda.
Wasiirka Caafimaadka Soomaaliya, Dr. Cali Xaaji Aadan, oo daahfuray qorshahan, ayaa tilmaamay in istiraatiijiyaddani ay diiradda saarayso xaqiijinta daryeel caafimaad oo joogto ah, iyadoo mudnaan gaar ah la siinayo caafimaadka hooyada iyo dhallaanka, iyo sidoo kale ka-hortagga cudurrada faafa.
Sida ku cad qorshahan cusub, waxaa door weyn la siin doonaa tayeynta iyo kordhinta tirada shaqaalaha caafimaadka, iyo hirgelinta nidaamyo xog-ururin oo casri ah oo fududeynaya qorsheynta iyo qiimeynta xaaladda caafimaad ee waddanka.
Munaasabadda daahfurka oo ka dhacday caasimadda, ayaa waxaa kasoo qaybgalay xubno isugu jira Wasiir Ku-xigeenka Maaliyadda, Safiirka Talyaaniga ee Soomaaliya, agaasimayaal heer federaal iyo dowlad-goboleed, iyo wakiillo ka socday hay’adaha caalamiga ah iyo Ururka Dhakhaatiirta Soomaaliyeed.
Mas’uuliyiintan ayaa isku raacay in iskaashi dhow oo dhexmara dowladda iyo saaxiibada caalamiga ah uu saldhig u yahay dhismaha nidaam caafimaad oo adkeysi leh, kaas oo awood u leh inuu si hufan uga jawaabo xaaladaha degdegga ah iyo cudurrada dillaaca.
