Agaasimaha Guud ee Hay’adda Ilaalinta Xogta Shakhsiyeed ee Soomaaliya, Maxamed Nuur Colow, ayaa ka qayb galay kulankii labaad ee Guddiga Fulinta ee Shabakadda Islaamiga ah ee Hay’adaha Ilaalinta Xogta Shakhsiyeed (INPDPA), kaas oo lagu qabtay magaalada Istanbul ee dalka Turkiga.
Kulanka ayaa diiradda lagu saaray hirgelinta xeerarka iyo nidaamyada shabakadda, xoojinta iskaashiga u dhexeeya dalalka Islaamka ee dhinaca ilaalinta xogta shakhsiyeed, is-weydaarsiga aqoonta iyo khibradaha, iyo ka doodista caqabadaha la xiriira tiknoolojiyadda cusub iyo amniga macluumaadka.
Agaasime Maxamed Nuur Olow ayaa kulanka ka sheegay sida ay Soomaaliya uga go’an tahay hirgelinta himilooyinka iyo ujeeddooyinka shabakadda, isagoo carrabka ku adkeeyay muhiimadda ay leedahay ilaalinta xogta shakhsiyeed iyo dhowrista xuquuqda muwaadiniinta.
Ka qaybgalka Soomaaliya ee kulankan ayaa muujinaya dadaallada socda ee lagu xoojinayo nidaamka ilaalinta xogta dalka, kor u qaadidda iskaashiga caalamiga ah, iyo la jaanqaadidda heerarka iyo habraacyada casriga ah ee la xiriira amniga xogta iyo xuquuqda gaarka ah ee dadka.
