Dowladda Federaalka Soomaaliya iyo Jamhuuriyadda Islaamiga ah ee Pakistan ayaa magaalada Islamabad ku kala saxiixday heshiis cusub oo meesha ka saaraya dal-ku-galka ee dadka sita baasaboorrada Diblomaasiyadeed, tallaabadaas oo qayb ka ah dadaallada lagu xoojinayo xiriirka labada dal ee walaalaha ah.
Munaasabadda saxiixa heshiiskan oo dhacday 24-kii Janaayo, waxaa goobjoog ka ahaa Madaxweynaha Pakistan, Asif Ali Zardari iyo Wasiirka Arrimaha Gudaha Soomaaliya, Cali Yuusuf, oo booqasho rasmi ah ku jooga dalkaas.
Heshiiskan ayaa u oggolaanaya mas'uuliyiinta iyo diblomaasiyiinta labada dal ee sita baasaboorrada diblomaasiyadeed inay u kala safraan Soomaaliya iyo Pakistan iyaga oo aan u baahneyn fiiso hore. Tani ayaa la filayaa inay dardargeliso is-dhaafsiga diblomaasiyadeed iyo fududeynta hawlaha rasmiga ah ee u dhexeeya labada xukuumadood.
Heshiiska waxaa dhanka Soomaaliya u saxiixay Xoghayaha Joogtada ah ee Wasaaradda Arrimaha Dibadda, Hamza Aadan Haadoow, halka dhanka Pakistan uu u saxiixay Xoghayaha Gaarka ah ee Wasaaradda Arrimaha Gudaha, Dawood Muhammad Baraech.
Intii uu socday kulanka ka dhacay Madaxtooyada Islamabad, Wasiirka Arrimaha Gudaha Soomaaliya, Cali Yuusuf, ayaa Madaxweyne Zardari gaarsiiyay dhambaal rasmi ah oo uu ka siday Madaxweynaha Jamhuuriyadda Federaalka Soomaaliya.
Dhambaalkaas ayaa xambaarsanaa farriin ku aaddan sida ay Muqdisho uga go'an tahay xoojinta iyo ballaarinta xiriirka taariikhiga ah ee kala dhexeeya Islamabad.
Dowladda Soomaaliya ayaa uga mahadcelisay Pakistan garab-istaagga joogtada ah iyo soo dhoweynta diirran, iyadoo labada dhinacba ay isla garteen muhiimadda ay leedahay in la joogteeyo wada-tashiyada iyo mashaariicda horumarineed ee danaha guud ku dhisan.
Tallaabadan ayaa ku soo beegmaysa xilli Soomaaliya ay waddo dadaallo ay ku ballaarinayso saaxiibaddeeda caalamiga ah iyo fududeynta dhaqdhaqaaqa diblomaasiyadeed ee dalka.
