| Somali
TURKIGA
3 daqiiqo akhris
Turkiga oo Baarlamaanka u gudbiyay heshiis difaac wadajir ah oo uu la galay Pakistan iyo Sacuudiga
Hindise-sharciyeedka oo ka kooban saddex qodob ayaa lagu dari doonaa ajandaha Golaha Guud ee Baarlamaanka Turkiga marka uu ansixiyo Guddiga Arrimaha Dibadda ee Baarlamaanka.
Turkiga oo Baarlamaanka u gudbiyay heshiis difaac wadajir ah oo uu la galay Pakistan iyo Sacuudiga
Saddexda dal ayaa ballanqaaday inay iska kaashan doonaan ilaalinta madax-bannaanida, midnimada dhuleed iyo qaranimada midba midka kale. / Anadolu Agency

Hindise-sharciyeed lagu doonayo in Baarlamaanka Turkiga uu ansixiyo heshiis difaac wadajir ah oo u dhexeeya Turkiga, Pakistan iyo Sacuudi Carabiya ayaa loo gudbiyay Baarlamaanka dalkaas.

Hindise-sharciyeedkan oo ka kooban saddex qodob, isla markaana Arbacadii lagu gudbiyay saxiixa Guddoomiyaha Baarlamaanka Numan Kurtulmus, ayaa lagu dalbanayaa ansixinta Heshiiska Maka ee Difaaca Wadajirka ah, kaas oo saddexda dal ay ku saxiixeen magaalada Maka 7-dii Agoosto 2026.

Sida lagu sheegay qoraalka sharaxaadda ee hindise-sharciyeedka, heshiiska ayaa looga gol leeyahay in lagu xoojiyo wada-hadallada istiraatiijiga ah iyo iskaashiga ku dhisan kalsoonida labada dhinac ee dalalka gobolka.

Heshiiska ayaa sidoo kale lagu doonayaa in la dhiso hannaan amni oo ku saleysan iskaashi iyo awood wadajir ah oo looga hortago khataraha Bariga Dhexe iyo meelo ka baxsan, iyadoo la horumarinayo xalal goboleed oo lagula tacaalayo caqabadaha amniga.

Qoraalka ayaa lagu sheegay in ka hortagga gardarrada iyo hirgelinta xasillooni waarta oo gobolka ka dhalata ay mustaqbalka dhexe iyo kan fog yeelan doonaan saameyn wanaagsan oo dhinacyada bulshada iyo dhaqaalaha ah.

Sida heshiisku dhigayo, saddexda dal ayaa ballanqaadaya inay iska kaashan doonaan ilaalinta madax-bannaanida, midnimada dhuleed iyo qaranimada midba midka kale.

Waxay sidoo kale ballanqaadayaan inay is taageeri doonaan marka ay adeegsanayaan xuquuqdooda is-difaaca ee uu dhigayo Axdiga Qaramada Midoobay.

Sida ku cad qoraalka sharaxaadda, tallaabooyinka noocaas ah waxay ku xirnaan doonaan waajibaadka dastuuriga ah, sharciyada qaranka iyo go’aannada hay’adaha awoodda u leh ee dal kasta.

Qoraalka ayaa caddeeyay in qodobka difaaca wadajirka ah uusan si toos ah u dhaqan-geli doonin marka uu weerar dhaco.

Taa beddelkeeda, tallaabo kasta oo jawaab-celin ah waxay ku xirnaan doontaa go’aanno ay dhinacyadu si wadajir ah ugu heshiiyaan kaddib wada-tashiyo ay yeeshaan.

Heshiiska ayaa looga gol leeyahay in lagu xoojiyo awoodda wadajirka ah ee looga hortagayo khataraha iyo weerarrada ay saddexda dal si wadajir ah ugu qiimeeyaan inay saameynayaan amnigooda, oo ay ku jirto argagixisadu.

Waxaa sidoo kale lagu doonayaa in la wanaajiyo awoodda ciidamada qalabka sida ee saddexda dal ay si wadajir ah ugu hawlgeli karaan, iskaashigooda iyo isku-duwidda hawlahooda, isla markaana la sii xoojiyo iskaashiga warshadaha difaaca.

Heshiiska oo aan saameyn ku yeelan doonin waajibaadka NATO

Qoraalka sharaxaadda ayaa carrabka ku adkeeyay in heshiisku uu yahay mid difaac oo keliya, isla markaana aan lagu bartilmaameedsanayn dalna.

Waxaa lagu sheegay in hannaanka heshiisku ku dhisan yahay in dalalka gobolku ay hormuud ka noqdaan arrimaha amnigooda, iskaashi amni iyo ka-qaybgal loo dhan yahay.

Sida qoraalku dhigayo, heshiiska wuxuu u furan yahay dalalka gobolka ee doonaya inay gacan ka geystaan nabadda, xasilloonida iyo amniga, iyagoo ixtiraamaya sharciga caalamiga ah, midnimada dhuleed, sinnaanta madax-bannaanida dowladaha iyo mabda’a faragelin la’aanta arrimaha gudaha.

Qoraalka ayaa sidoo kale lagu adkeeyay in heshiisku uusan meesha ka saari doonin ama beddeli doonin waajibaadka hore ee Turkiga uga saaran heshiisyada laba geesoodka ah ama kuwa dhinacyada badan.

Waxaa lagu sheegay in ujeeddooyinka heshiiska ee amniga iyo xasilloonida gobolka ay waafaqsan yihiin himilooyinka amni ee NATO ee gobolka Yurub iyo Waqooyiga Atlantic.

Sida qoraalku dhigayo, xuquuqda iyo waajibaadka Turkiga ee xubinnimadiisa NATO wax saameyn ah kuma yeelan doono heshiiskan.

Heshiiska ayaa la filayaa inuu sii xoojiyo xiriirka laba geesoodka ah ee Turkiga kala dhexeeya Pakistan iyo Sacuudi Carabiya ee dhinacyada difaaca iyo amniga, isagoo sidoo kale taageeraya dhismaha hannaan amni oo goboleed oo loo dhan yahay.

Hindise-sharciyeedka ayaa waxaa marka hore ka doodi doona Guddiga Arrimaha Dibadda ee Baarlamaanka, kaas oo loo xilsaaray inuu noqdo guddiga ugu weyn ee qaabilsan.

Haddii guddigu ansixiyo, hindise-sharciyeedka waxaa lagu dari doonaa ajandaha Golaha Guud ee Baarlamaanka.

XIGASHO:َAA
Raadi Warar Kale
Turkiga oo xusay sannad-guuradii 88-aad ee geerida Ataturk
Danjiraha Turkiga ee Soomaaliya oo kulan la yeeshay Madaxweynihii 9-aad ee Soomaaliya
Shirka cimilada COP31 oo Turkiga ka furmaya xilli ay kordhayaan baaqyada tallaabooyin wax-ku-ool ah
Saameynta dagaalka Bariga Dhexe ee tamarta ayaa laba jibbaar ka culus xayiraaddii 1973: Simsek
Wasiir Fidan oo ka digay in marinnada badda ay isu beddeli karaan goobo dagaal
Qaza la’aanteed Falastiin ma jirto, nabadna ma jirto ilaa la soo afjaro gumeysiga Israa’iil: Kalin
Erdogan oo ‘pacta sunt servanda’ u cuskaday Qaza, cambaareeyayna deegaameystayaasha Israa’iil
Diblumaasiyiinta Soomaaliya oo ka tacsiyadeeyay geerida Danjirihii Turkiga ee Koonfurta Suudaan
Baarlamaanka Turkiga oo ansixiyay Heshiiska Difaaca Wadajirka ah ee Maka
Marwada koowaad ee Turkiga oo xustay xiriirka taariikhiga ah ee Kuuriyada Koonfureed
Soomaaliya iyo Turkiga oo ka wada-hadlay xoojinta iskaashiga waaxda caafimaadka
MW Erdogan oo booqasho ka bilaabay Kuuriyada Koonfureed si loo xoojiyo iskaashiga istaraatiijiga ah
Erdogan iyo Trump oo ka wada hadlay xiisadaha gobolka, dagaalka Yukreyn iyo xiriirka labada dal
Erdogan oo Spain uga tacsiyeeyay shil tareen oo galaaftay nolosha 68 qof
Madaxweyne Erdogan : "Turkigu maanta wuu ka xoog badan yahay sidii uu shalay ahaa"
Turkiga iyo Canada oo hiigsanaya ganacsi gaaraya $10B, iyadoo Erdogan uu ku dhawaaqay ‘waa cusub'
Turkiga oo soo dhoweeyay taageerada Baarlamaanka Liibiya ee heshiiskii badda ee 2019
Madaxweynaha Turkiga oo Azerbaijan ugu hambalyeeyay Maalinta Dib-u-soo-celinta Xornimada
Turkiga oo ku baaqay tallaabo caalami ah oo laga qaado xadgudubka Israa’iil ee sharciga caalamiga ah
Wasiirka Arrimaha Dibadda Turkiga Fidan oo gaaray Baku si uu uga qaybgalo shirweynaha amniga Aasiya