Isbaheysiga Milateriga Islaamka ee la Dagaallanka Argagixisada (IMCTC), oo gacan ka helaya dalka Sucuudi Carabiya, ayaa magaalada Muqdisho ka daah-furay tababar weyn oo qayb ka ah hindise istaraatiijiyadeed oo warbaahineed kaas oo loogu magac daray "Wariyayaasha Nabadda".
Munaasabadda lagu furayay barnaamijkan ayaa waxaa si wadajir ah u daah-furay Xoghayaha Guud ee Isbaheysiga IMCTC, Sarreeye Gaas Maxamed bin Saciid Al-Moghidi, Wasiirka Gaashaandhigga Soomaaliya, Axmed Macallin Fiqi, iyo Agaasimaha Guud ee Difaaca ee Wasaaradda Gaashaandhigga, Cabdulqaadir Abuukar Maxamed.
Ujeeddada ugu weyn ee barnaamijkan ayaa ah in kor loo qaado awoodda warbaahinta qaranka si ay uga hortagto hadallada xagjirnimada ah, naceybka, ololeyaasha marin-habaabinta ah, iyo faafinta dacaayadaha argagixisada ee dhanka baraha bulshada iyo intarneedka.
Tababarkan oo socon doona muddo afar maalmood ah ayaa waxaa ka faa'iidaysanaya ilaa 40 qof oo isugu jira suxufiyiin ka socda warbaahinta dowladda iyo midda gaarka ah, dadka saamaynta ku leh baraha bulshada, aqoonyahanno, iyo khubaro warbaahineed.
Sidoo kale, munaasabadda daah-furka waxaa goobjoog ka ahaa Ergayga Soomaaliya u qaabilsan Isbahaysiga IMCTC, Sarreeye Guuto Cabdiraxmaan Maxamed Tuuryare, saraakiil ka socotay Isbahaysiga, iyo xubno kale oo muhiim ah oo ka tirsan hay'adaha amniga iyo taliska milateriga Soomaaliya.
Barnaamijkan ayaa qayb weyn ka ah iskaashiga Soomaaliya iyo Isbahaysiga ee ku aaddan xoojinta kaalinta warbaahinta, tayeynta xirfadaha shaqaalaha warbaahinta, iyo ka-hortagga faafinta fikirka xagjirka ah.
Wasiir Axmed Macallin Fiqi oo munaasabadda ka hadlay ayaa hoosta ka xarriiqay in la-dagaallanka argagixisadu aanu ku koobnayn oo keliya awood milateri iyo mid amni, balse loo baahan yahay in la helo fariimo warbaahineed oo mas'uuliyadi ku jirto.
Wuxuu sheegay in arrintani ay muhiim u tahay in bulshada laga gaashaansho xagjirnimada iyo marin-habaabinta, islamarkaana la xoojiyo qiyamka is-dhexgalka iyo qunyar-socodnimada.
Sidoo kale, wasiirka ayaa ammaanay doorka isbaheysiga IMCTC ee uu Sucuudigu hoggaamiyo oo ku aaddan dhisidda awoodda qaranka iyo tababaridda suxufiyiin xirfad leh, isagoo caddeeyay in Soomaaliya ay weli tahay saaxiib firfircoon oo ka qayb qaadanaya ciribtirka afkaarta iyo dhaqaalaha ay ku tiirsan yihiin kooxaha argagixisada.
Dhankiisa, Xoghayaha Guud ee IMCTC Sarreeye Gaas Al-Moghidi ayaa xaqiijiyay in hindisahani uu higsanayo inuu suxufiyiinta ka beddelo dad tebiya xogta uun, kana dhigo xirfadlayaal warbaahineed oo awood u leh lafagurka, xaqiijinta, iyo ka-hortagga fariimaha qaldan.
Mudada uu tababarku socdo, ka-qaybgalayaasha ayaa diiradda saari doona adeegsiga qalabka iyo teknoolojiyadda casriga ah, baaritaanka xogaha furfuran (OSINT), falanqaynta sawirrada iyo muuqaallada, iyo falanqaynta saamaynta nafsiyeed ee fariimaha xagjirnimada.
Waxaa si gaar ah loogu tababari doonaa aqoonsiga iyo soo-bandhigidda ciwaannada beenta ah ee kooxaha argagixisada, iyo diyaarinta fariimo wax ku ool ah oo bulshada lagu wacyigelinayo si loo xoojiyo nabadda iyo wadajirka.
