Madaxweynaha Tansaaniya, Samia Suluhu Hassan, ayaa magacawday Mwigulu Nchemba inuu noqdo Ra’iisul Wasaaraha cusub ee dalka, sida uu ku dhawaaqay Afhayeenka Baarlamaanka Khamiistii.
Nchemba, oo hore u soo noqday Wasiirka Maaliyadda iyo Qorsheynta, wuxuu qaadanayaa xilkan sare isagoo xukuumadda u keenaya khibrad ballaaran.
Taariikhda shaqo iyo waxbarasho
Nchemba waxa uu ka mid ahaa xubnaha sarsare ee golaha wasiirada Tansaaniya, isagoo xilka Wasiirka Arrimaha Gudaha soo hayay intii u dhaxaysay 2016 ilaa 2018.
Kahor intii uusan ku biirin siyaasadda Tansaaniya ee doorashada ku timaadda, Dr. Nchemba waxa uu dhaqaale yahan ka ahaa Bankiga Tansaaniya. Intaas kadib, waxaa loo magacaabay Ku-xigeenka Wasiirka Wasaaradda Maaliyadda iyo Qorsheynta Dhaqaalaha, xilligaas oo uu Madaxweyne ahaa Jakaya Kikwete.
Xagga waxbarashada, Mudane Nchemba waxa uu Shahaadada Masterka ee Dhaqaalaha ka qaatay Jaamacadda Dar es Salaam, waxaana uu isla machadkaas ka helay Shahaadada PhD ee Dhaqaalaha.
Xilka cusub oo yimid xilli xasaasi ah
Magacaabista Ra’iisul Wasaaraha cusub ayaa timid xilli ay Madaxweyne Samia Suluhu Hassan xilka u qabatay muddo labaad oo shan sano ah.
Madaxweyne Samia Suluhu Hassan waxaa la dhaariyay 3-dii Noofambar, 2025, kadib markii ay si aqlabiyad ah ugu guulaysatay doorashadii dhacday bishii la soo dhaafay.
Guddiga Madaxa Banaan ee Doorashooyinka Qaranka (NEC) ayaa ku dhawaaqay in Suluhu ay ku guulaysatay doorashada boqolkiiba 97.66% codadkii la dhiibtay, iyadoo heshay in ka badan 31.9 milyan oo ka mid ah 32.7 milyan oo cod.
Guushani waxay u kordhisay madaxtinimadeeda muddo labaad. Dhaarinta Madaxweynaha ayaa dhacday iyadoo ay jireen banaanbaxyo, xiisado siyaasadeed, iyo go'doomin internet oo dalka oo dhan ah.
