Degmada xeebeedka ah ee Warsheekh ayaa qarka u saaran inay isku beddesho xarun caalami ah oo laga diro gantaallada hawada sare, kaddib markii uu halkaas kormeer ku tagay Safiirka Turkiga ee Soomaaliya, Ferhat Alkan, iyo wafdi sarsare oo isugu jira mas'uuliyiin diblumaasiyadeed, milateri, iyo ganacsi.
Kormeerkan ayaa imanaya un kaddib markii uu Madaxweynaha Turkiga, Recep Tayyip Erdogan, bogaadiyay mashruucan, isagoo ku sifeeyay "iskaashi taariikhi ah" oo kor u qaadaya awoodda hawada sare ee Turkiga, dhanka kalena albaab cusub u furaya qaaradda Afrika.
Safiirka oo uu wehlinayo Taliyaha Ciidamada Turkiga ee Soomaaliya, Sarreeye Gaas Sebahattin Kalkan, ayaa kormeeray goobta rasmiga ah ee laga fulinayo mashruuca weyn.
Wafdiga ayaa warbixin la xiriirta hannaanka dhismaha ka dhageystay Ahmet Sami İşler, oo ah Maareeyaha Guud ee Shirkadda Albayrak ee Soomaaliya, isla markaana ah Guddoomiyaha Golaha Ganacsiga Turkiga iyo Soomaaliya (DEİK).
Is-dhexgalka Bulshada Warsheekh
Si ka duwan kormeeradii rasmiga ahaa, wafdiga Turkiga ayaa ahmiyad gaar ah siiyay is-dhexgalka iyo daryeelka bulshada martigelinaysa xaruntan.
Wafdiga ayaa kormeeray isbitaal iyo iskuul dib-u-dayactir iyo taageero ka helay dowladda Turkiga, halkaas oo ay kula kulmeen maamulka degmada, odayaasha deegaanka iyo ardayda.
Sida ay xaqiijisay Safaaradda Turkiga, mas'uuliyiinta ayaa tagay xeebta Warsheekh iyagoo xog-wareystay kalluumeysatada deegaanka. Dhanka kale, si uu u muujiyo isku-xirnaanta bulshada, Safiir Alkan ayaa goob fagaare ah dhallinyarada Warsheekh kala qaybgalay ciyaar kubadda cagta ah, taas oo soo jiidatay dareenka dadka deegaanka.
Soomaaliya oo noqonaysa Hormuudka Hawada Sare
Ujeeddada safarkan ayaa ahayd in mas'uuliyiintu ay si toos ah ula falgalaan shacabka ku nool degmadan oo dhowaan isku beddeli doonta il-biyoodka sayniska iyo tiknoolajiyadda.
Safiir Alkan ayaa rajo weyn geliyay shacabka Soomaaliyeed, isagoo madasha ka yiri: "Mashruucan, Soomaaliya waxay noqon doontaa mid ka mid ah xarumaha hormuudka ka ah hawlaha hawada sare ee dunida."
Khubarada ayaa aaminsan in xaruntan cusubi ay weji cusub u yeelayso xiriirka Muqdisho iyo Ankara, kaas oo haatan ka gudbaya iskaashigii caadiga ahaa ee difaaca iyo amniga, una tallaabaya dhanka tiknoolajiyadda casriga ah.
Ugu dambeyn, mashruucan ayaa fursad naadir ah u abuuri doona Soomaaliya, maadaama uu jaamacadaha dalka, injineerrada soo baxaya, iyo hay'adaha dowladda u furi doono waddo ay kaga qayb-qaataan tababarrada, cilmi-baarista, iyo shaqooyinka tooska ah ee la xiriira diyaarinta iyo dirista dayax-gacmeedyada.
