Xukuumadaha Turkiga iyo Faransiiska ayaa kala saxiixday qorshe cusub oo lagu ballaarinayo iskaashiga dhinaca difaaca iyo xiriirka milateri ee labada waddan, sida ay Sabtidii shaacisay Wasaaradda Difaaca ee Turkiga.
Heshiiskan ayaa yimid kaddib markii Agaasimaha Guud ee Difaaca iyo Amniga Turkiga, Sarreeye Guud Ilkay Altindag, uu kulamo la qaatay mas’uuliyiin sarsare oo Faransiis ah.
Mas'uuliyiintan waxaa ka mid ahaa Alice Rufo oo Wasaaradda Difaaca Faransiiska u qaabilsan arrimaha ciidamada, Taliyaha Milateriga ee Madaxtooyada Jeneraal Vincent Giraud, iyo Agaasimaha Guud ee Xiriirka Caalamiga ah iyo Istaraatiijiyadda Guillaume Ollagnier.
Wada-hadallada dhexmaray saraakiishan ayaa diiradda lagu saaray xiriirka difaaca iyo milateriga, wada-hadallada istaraatiijiga ah, iyo sidii loo horumarin lahaa iskaashiga iminka u dhexeeya labada dhinac.
Sidoo kale, xubnaha ayaa isla gartay muhiimadda ay leedahay in la joogteeyo kulamada laba-geesoodka ah si looga xaqiijiyo natiijooyin wax-ku-ool ah.
Wasaaradda Difaaca Turkiga ayaa xustay in qorshahan difaac ee la saxiixay uu si dhab ah u muujinayo in farriimihii wanaagsanaa ee ay muddooyinkii dambe is-dhaafsadeen hoggaamiyeyaasha labada dal ay hadda isu beddeleen tallaabooyin rasmi ah oo la taaban karo.
“Qorshuhu waxa uu ujeeddadiisu yahay in la xoojiyo wada-hadallada istaraatiijiga ah, iyadoo la joogteynayo kulamada natiijada lagu raadinayo, isla markaana la sii horumarinayo iskaashiga labada dal si loo xaqiijiyo danaha wadajirka ah,” ayaa lagu yiri bayaanka kasoo baxay wasaaradda.
