Taliban na son kafa cikakkiyar dangantakar diflomasiyya da Amurka, amma ta ce Washington dole ne ta fara magance abin da ta bari a baya bayan yaƙin da ta kwashe shekaru 20 tana yi a Afghanistan, kamar yadda kakakin Taliban, Abdul Qahar Balkhi, ya shaida wa CBS News a wata hira.
Shekaru biyar bayan Taliban ta sake karɓar mulki sakamakon janyewar sojojin Amurka, Balkhi ya bayyana kawo ƙarshen mamayar a matsayin babbar nasarar gwamnatinsu, yayin da ya amince cewa har yanzu akwai matsalolin rashin aikin yi, matsin tattalin arziki da kuma rashin gamsuwar wasu daga cikin al'umma.
“Babbar nasarar da Afghanistan ta samu a fili ita ce kawo ƙarshen mamaya,” in ji Balkhi, yana mai cewa tun daga lokacin an samu ci gaba a fannonin tsaro, cinikayya, zuba jari da samar da ababen more rayuwa.
Ya yi iƙirarin cewa darajar kayayyakin da Afghanistan ke fitarwa zuwa ƙasashen waje ta ƙaru daga dala miliyan 750 a shekarar 2020 zuwa kusan dala biliyan biyu, yayin da adadin masana'antun ƙasar ya ƙaru daga 1,500 zuwa 6,000.
Ya kuma ce gwamnati ta iya biyan albashin ma'aikatan gwamnati tare da jawo biliyoyin daloli na zuba jari.
Sai dai Balkhi ya amince cewa “akwai wasu fannoni da ba mu cim ma burin jama'a ba,” yana mai ambaton yawaitar rashin aikin yi da sauran ƙalubale.
Keɓewar diflomasiyya
Hirar da aka yi ranar Talata ta kuma bayyana yadda Afghanistan ke ci gaba da fuskantar keɓewar diflomasiyya. Rasha ce kaɗai ƙasar da ta amince da gwamnatin Taliban a hukumance.
Balkhi ya ce Afghanistan tuni tana gudanar da hulɗar diflomasiyya da ƙasashe da dama, yana kuma tambayar muhimmancin amincewa da gwamnati a hukumance a aikace.
Dangane da alaƙar da Washington, ya ce Kabul na son ƙulla dangantakar diflomasiyya da “kowace ƙasa a duniya, ciki har da Amurka,” yana mai cewa za su marabci sake buɗe ofishin jakadancin Amurka da kuma zuba jarin Amurkawa a fannoni kamar ma'adinai da iskar gas.
Ya kuma yi watsi da kiran da Shugaban Amurka Donald Trump ya yi na mayar da biliyoyin dalolin kayan aikin soji da Amurka ta samar kuma aka bari a Afghanistan bayan janyewar sojojinta a shekarar 2021.
A cewar CBS News, an bar kayan aikin soji na Amurka da darajarsu ta kai kusan dala biliyan bakwai a Afghanistan.
“Waɗannan kadarorin gwamnatin Afghanistan ne,” in ji Balkhi, yana ƙin duk wata yarjejeniya da za ta danganta kayan aikin sojin da kuɗaɗen Afghanistan da aka daskarar a ƙasashen waje.
Da aka tambaye shi game da hujjar cewa masu biyan haraji na Amurka ne suka biya kuɗin kayan aikin, Balkhi ya ce:
“Amurkawa sun yi abubuwa da yawa. Amurkawa sun kashe mutane da yawa, sun lalata mafi yawan ƙasar. Shin bai kamata su fara biyan diyya kan hakan ba?”
Bukatar a saki kuɗaɗen Afghanistan da aka riƙe
Balkhi ya buƙaci Washington ta saki kadarorin Babban Bankin Afghanistan da aka daskarar, yana mai cewa kuɗaɗen na gwamnatin Afghanistan ne, ba na gwamnatin Taliban ba.
A yayin da ake bikin cika shekaru 25 da harin 11 ga Satumba, Balkhi ya ce Taliban na Allah wadai da hare-haren da ake kai wa fararen hula, tare da sake jaddada cewa a ƙarƙashin yarjejeniyar Doha, Afghanistan ba za ta zama sansanin kai hari kan Amurka ko wata ƙasa ba.
Hirar ta kuma tabo batun takunkumin da Taliban ta sanya kan mata da 'yan mata.
Dangane da dakatar da karatun 'yan mata a makarantun gwamnati daga aji na bakwai zuwa sama, Balkhi ya ce har yanzu akwai wasu hanyoyin samun ilimi, yana kuma musanta rahotannin cewa wasu 'yan mata na zuwa makarantun ɓoye duk da dokar.
“Babu wata makarantar ɓoye,” in ji shi, yana mai bayyana irin wannan karatun da cewa koyarwa ce a gida ko kuma makarantar madrasa, wato ilimin addinin Musulunci.
Da yake waiwayar yaƙin da ya biyo bayan hare-haren 11 ga Satumba na shekarar 2001, Balkhi ya ce Afghanistan ta koyi cewa ya kamata a warware rikice-rikice ta hanyar diflomasiyya.
“Yaƙi ba shi ne mafita ba, kuma mamaye Afghanistan ba zai kasance cikin amfaninka ba,” in ji shi, yana kira da a ƙara haɗin gwiwa wajen sake gina Afghanistan da bunƙasa tattalin arzikinta.
