Matatar Mai ta Dangote ta Nijeriya ta ƙara ƙarfin da take da shi inda a yanzu take tace ganga 700,000 a kowace rana yayin wani gwajin aiki da masu ba da lasisin fasahar sarrafa mai suka gudanar, inda ta zarce ƙarfinta na asali na ganga 650,000 a rana. Kamfanin a ranar Alhamis ya bayyana cewa wannan babban ci gaba ne a ayyukanta.

Mataimakin shugaban sashen mai da iskar gas na Dangote Industries, Devakumar Edwin, ya ce wannan ƙarin ƙarfin wani ɓangare ne na shirin faɗaɗa ƙarfin matatar zuwa ganga miliyan 1.4 a rana cikin watanni 30 masu zuwa, matakin da zai iya sanya ta cikin manyan matatun mai mafi girma a duniya.

Matatar, wadda attajirin ɗan kasuwa Aliko Dangote ya mallaka, ta fara samar da man fetur a shekarar 2024, kuma tun daga lokacin take ci gaba da ƙara yawan samar da fetur, dizal da man jiragen sama.

Matatar tana samar da man da ake amfani da shi a cikin gida tare da fitar da kayayyaki zuwa ƙasashen Afirka da Turai, ciki har da Birtaniya da Faransa da Holland. Haka kuma tana fitar da kayayyaki zuwa Amurka da Saudiyya.

Matatar Dangote ta zama babbar mai samar da man fetur a lokacin da ake fuskantar tangardar samar da mai a duniya sakamakon rikice-rikicen Gabas ta Tsakiya, inda masu saye a Afirka ke neman hanyoyin samar da mai.

Bisa ga bayanan kamfanin nazari na Kpler, yawan man da matatar ke fitarwa ya ƙaru daga ganga 168,000 a rana a watan Fabrairu zuwa ganga 353,000 a rana a watan Afrilu, inda kusan rabin wannan adadi ya tafi wasu ƙasashen Afirka.

Wannan ƙaruwa babban ci gaba ne ga matatar mai mafi girma a Afirka, kuma yana nuna yadda take zama babban mai samar da mai a yankin. Sai dai masana sun yi gargadin cewa kada a yi gaggawa a hasashen cewa yadda abubuwa ke tafiya a yanzu zai tabbatar da dauwamammen canji a kasuwanci, musamman bayan fitar da mai ya ragu zuwa ganga 285,000 a rana a watan Mayu.