Shugaban Amurka Donald Trump ya ƙi bayyana goyon bayansa ga Firaministan Isra’ila Benjamin Netanyahu domin ya sake ci gaba da mulki, gabanin zaɓukan da ke tafe.

“Abin da zan iya cewa kawai shi ne, yanzu ba na shiga harkokin siyasa, sai dai cewa muna da farin jini,” Trump ya shaida wa mujallar TIME ranar Alhamis, lokacin da aka tambaye shi ko ya kamata Netanyahu ya sake samun wani wa’adi a zaɓukan da za a gudanar a ranar 27 ga Oktoba.

Lokacin da aka sake matsa masa da tambayar, Trump ya ce: “A’a, babban abin da nake so shi ne in taimaka musu wajen kare Isra’ila,” inda ya kauce wa bayar da goyon baya kai tsaye ga Netanyahu a cikin hirar da aka yi da shi ranar Litinin.

A maimakon haka, Trump ya yi nuni da farin jinin da yake ikirarin yana da shi a tsakanin jama’ar Isra’ila, yana cewa ya kai kusan “kashi 99 cikin 100”, sakamakon manufofin da ya aiwatar a baya.

Da aka tambaye shi ko Washington za ta iya samun kyakkyawar alaƙar aiki da ɗan takarar adawa kuma tsohon babban hafsan sojin Isra’ila Gadi Eisenkot, Trump ya ce bai “ji wani mummunan abu game da shi ba”, amma ya yi gargadin kada a raina Netanyahu.

“Mutane sun sha ɗauka cewa Bibi (Netanyahu) ya ƙare sau da dama, kamar yadda suka sha ɗauka cewa ni ma na ƙare sau da dama,” in ji Trump. “Ba zan raina Bibi ba.”

An ce dangantakar Trump da Netanyahu ta ƙara samun tangarda a cikin ‘yan watannin nan, sakamakon yaƙin da ake yi da Iran da kuma ci gaba da hare-haren Isra’ila a Lebanon da Gaza.

Trump ya kuma nuna shakku kan rahotannin cewa Netanyahu ya samu bayanan sirri tun kafin hare-haren 7 ga Oktoba, yana mai cewa da sojojin Isra’ila sun san hakan, da an sanya su cikin shirin ko-ta-kwana.

“Ba na tunanin haka. Ina ganin da ya sani, da ya ɗauki wani mataki a kai,” in ji Trump.

Yaƙin Iran

Da yake magana kan yaƙin Iran, wanda yanzu ya shiga wata na bakwai, Trump ya ce da gangan ya faɗaɗa hare-haren soji domin rusa ababen more rayuwa na makamai da na nukiliyar Tehran, bayan hasashen farko ya nuna cewa yaƙin zai ɗauki makonni huɗu zuwa takwas.

“Saboda kawai ina son mu ƙara zurfafa shi,” in ji Trump, yana bayanin dalilin da ya sa aka ci gaba da kai hare-haren bayan lokacin da aka tsara tun farko.

“Da na iya tsayawa a nan, amma na ji cewa bai dace ba,” in ji shi.

Trump ya amince cewa rufe mashigar Hormuz da Iran ta yi “ya yi tasiri na ɗan lokaci”, amma ya yi iƙirarin cewa daga baya Amurka ta karɓi iko da wannan muhimmin mashigar ruwa, wadda kafin yaƙin 28 ga Fabrairu ake safarar kusan kashi ɗaya bisa biyar na man da duniya ke amfani da shi ta cikinta.

Shugaban Amurkan ya kuma tabbatar da cewa Amurka ta ƙi tayin tsagaita wuta daga Iran, wanda ya haɗa da sake buɗe mashigar Hormuz, yana mai cewa sharuddan tayin “ba su isa ba”.

Da aka tambaye shi ko Washington na shirin ƙara tsananta hare-haren sama bayan zaɓukan tsakiyar wa’adin Majalisar Dokokin Amurka, Trump ya fara cewa “mai yiwuwa”, kafin daga bisani ya sauya magana.

“Ba zan iya gaya muku hakan ba,” in ji shi.