Wata guguwa mai ƙarfi da ta afkawa kudu maso-gabashin Faransa a ranar Juma'a ta katse wutar lantarki a gidaje 26,000, in ji tashar gabatar da shirye-shirye ta BFMTV.

Iyalai 26,000 a yankin Var sun rasa wutar lantarki a lokacin da yanayi mai tsanani ya munana, in ji mai gabatar da shirye-shiryen.

“Yau da safe, gidaje 1,000 sun kasance ba su da wutar lantarki a Toulon, Sainte-Maxime, Claviers da Seillans,” in ji mai gabatar da shirye-shirye, Simon Babre.

Ruwan sama mai tsanani da iska mai ƙarfi sun afka wa sassan kudu maso-gabashin Faransa.

An bayar da gargadin kar-ta-kwana game da tsawa a yankuna hudu da suka haɗa da Var, Alpes-Maritimes da sassa biyu na tsibirin Corsica. Var da Alpes-Maritimes sun samu gargadi game da ambaliyar ruwan.

A cikin ƙananan hukumomi da yawa a kudu maso-gabas da kudu maso-yammacin Faransa, an samu ruwan sama a rana guda mafi yawa a watan Agusta fiye da yadda aka taɓa gani a baya.

A awanni 24 da suka gabata, an wuce dukkan wasu bayanai na samu ruwa a rana guda da aka taɓa samu.

Hukumar Alpes-Maritimes ta ba da umarnin kwashe dukkan sansanonin da ke yankin, wanda aka fi ganin yana cikin hatsari a ƙarƙashin shirin rigakafin ambaliyar ruwa.

A yankin Pegomas, an kwashe mutane 200 da ke zaune a sansanin Mimosas cikin dare ɗaya.

Kazalika, guguwar ta kawo cikas ga zirga-zirgar jiragen sama sakamakon tsawa a Corsica, inda aka soke jirage da dama, wasu kuma aka jinkirta tashi ko saukar su.

Haka kuma guguwa ta afkawa kudu maso-yammacin Faransa, inda ta tumɓuke bishiyoyi ta kuma toshe hanyoyi, yayin da aka yi wa mutane kusan 20 magani saboda rashin isasshiyar iska.

Ma'aikatan kashe gobara sun ce mutane 700 sun nemi mafaka a cikin dakunan kwana biyu da karamar hukumar ta samar saboda guguwar.

An rawaito cewa dukkan tituna sun cika da ambaliyar ruwa.