Jeshi la Sudan limekanusha madai ya Mkuu wa Majeshi ya Ethiopia kwamba Sudan inaunga mkono makundi ya upinzani nchini Ethiopia, likiyaita madai hayo “yasiyo na msingi.”
Katika taarifa iliyotolewa mwishoni mwa Jumapili, Jeshi la Sudan lilisema kuwa Sudan inaendelea kuheshimu sheria za kimataifa na kanuni ya kutoingilia masuala ya ndani ya nchi nyingine. Hata hivyo, lilisisitiza kuwa halitaruhusu vitisho dhidi ya mamlaka yake, uhuru wa mipaka yake au usalama wa taifa.
Jeshi hilo pia liliitaka serikali ya Ethiopia kushughulikia tofauti zilizopo kupitia mazungumzo na njia rasmi za kidiplomasia, kwa lengo la kulinda utulivu wa nchi zote mbili pamoja na amani na usalama wa eneo zima.
Awali, Mkuu wa Majeshi ya Ethiopia, Field Marshal Birhanu Jula, aliishutumu Sudan, Misri na wadau wengine kwa kuunga mkono makundi yanayopinga serikali ya Ethiopia.
Kauli hiyo imekuja wakati kukiwa na ongezeko jipya la mvutano kaskazini mwa Ethiopia, ambako mapigano yamezidi kati ya vikosi vya serikali na wapiganaji wa Tigray People's Liberation Front (TPLF), pamoja na makundi yanayoshirikiana nayo.
