Gabriel Geay ni mmoja wa wakimbiaji mahiri wa mbio za masafa marefu (marathoni) kutoka Tanzania, na mafanikio yake yamemweka imara kwenye ramani ya kimataifa ya riadha.
Akiwa amezaliwa Tanzania Septemba 1996, Geay amejijengea sifa katika mbio za marathon, ambazo ni moja ya mashindano magumu zaidi katika riadha.
Na tayari amethibitisha kuwa anaweza kushindana na baadhi ya wakimbiaji bora duniani.
Historia na takwimu zake zinathibitisha hilo.
Mnamo Disemba 2022, Geay alikimbia kwa muda wa saa 2 na dakika 3 kamili katika mbio za Valencia Marathon nchini Hispania.
Rekodi ya kitaifa
Huo haukuwa tu muda wake bora binafsi, bali ilikuwa rekodi ya taifa la Tanzania — na ilimuweka Geay kuwa miongoni mwa wakimbiaji wa marathon wenye kasi zaidi duniani wakati huo.
Hata hivyo, kipaji cha Geay hakishii kwenye mbio za marathoni pekee.
Pia anashikilia rekodi ya taifa katika mbio za nusu marathon, kwa muda wa dakika 59 na sekunde 18, iliyowekwa mwaka wa 2025.
Shirikisho la Kimataifa la Riadha (World Athletics) limetambua pia viwango vyake vya juu vya ushindani.
Amepata nafasi miongoni mwa wakimbiaji bora wa marathon duniani — akifanikiwa kuingia katika kumi bora duniani kwenye viwango vya marathon vya World Athletics.
Hadhi ya Tanzania katika riadha duniani
Pia amewahi kumaliza katika nafasi nane za juu kwenye Mashindano ya Dunia, jambo linaloonyesha zaidi kiwango cha ushindani anachodhihirisha.
Simulizi ya Geay inavutia hasa kwa sababu Tanzania ina historia tajiri katika mchezo wa riadha, lakini kwa muda mrefu, uangalizi wa kimataifa umekuwa ukielekezwa zaidi kwa nchi jirani za Kenya na Ethiopia.
Sasa, wanariadha kama Gabriel Geay wanaonesha kuwa Tanzania imedhamiria kurejesha hadhi yake katika riadha kwa kuwekeza kwa vipaji vya ndani na hasa kizazi kipya katika marathon.
Endelea kufuatilia TRT Afrika Swahili tunapowaibua na kuwatambulisha wanariadha wengine chipukizi wenye vipaji vya kipekee kutoka Tanzania wanaostahili kufuatiliwa.
