Madaxweynaha dalka Suuriya, Axmed Al-Sharaa, ayaa si weyn u soo dhaweeyay go'aanka dalkiisa looga saaray liiska Maraykanka ee dalalka lagu eedeeyo inay taageeraan argagixisada.
"Waxaan ugu hambalyeynayaa shacabka Suuriya ka saaridda rasmiga ah ee magaca Suuriya laga saaray liiska dalalka taageera argagixisada," ayuu yiri Madaxweyne Al-Sharaa oo hadlayay Isniintii.
Wuxuu intaas raaciyay, "Waxaan u mahadcelinayaa Madaxweynaha Maraykanka iyo dhammaan walaalaha iyo asxaabta garab istaagay Suuriya iyo shacabkeeda."
Wasiirka Arrimaha Dibadda ee Suuriya, Asacad Al-Shaibani, ayaa isna go'aankan soo dhaweeyay oo ku tilmaamay "natiijo ka dhalatay isbeddelka ay shacabka Suuriya horseedeen," isagoo xusay in tallaabadani ay ka tarjumayso sida dawladda cusub ay uga go'an tahay ilaalinta nabadda iyo amniga caalamka.
Wasiirka oo qoraal soo dhigay bartiisa X ayaa yiri: "Waxaan shacabka Suuriya ugu hambalyeynaynaa guushan taariikhiga ah."
Wuxuu xusay in shaabadda argagixiso ee dalkaas saarnayd 47-ka sano "aysan marnaba ahayn doorashada shacabka Suuriya, mana ahayn mid u qalanta Suuriya iyo taariikhdeeda." Wuxuu intaas ku daray in hoos imaadka hoggaanka Madaxweyne Al-Sharaa, ay Suuriya sii wadi doonto dadaallada ay kaga baxayso go'doonka caalamiga ah.
Dhanka kale, Ergayga Gaarka ah ee Maraykanka u qaabilsan Suuriya, Tom Barrack, ayaa dhacdadan ku tilmaamay "tallaabo wax ku ool ah" oo muujinaysa in Suuriya ay go'doon kaga gudubtay iskaashi caalami ah.
Barrack ayaa sheegay in liiskani uu ahaa "darbi kale oo shacabka Suuriya ka hor-istaagayay maalgashiga, ganacsiga, iyo fursadaha lagama maarmaanka u ah dib-u-dhiska dalkooda." Isagoo sharraxaya fursadda cusub ayuu yiri; "Marka xayiraaddan la qaaday, hantidu waxay beddeli kartaa colaadda, ganacsiguna wuxuu beddeli karaa go'doominta, taasina waxay ka guulaysan doontaa fowdada," wuxuuna tallaabadan ku sifeeyay gundhigga xiriir ku dhisan amni iyo barwaaqo wadaag ah.
Hadalladan ayaa imanaya saacado un kaddib markii Wasaaradda Arrimaha Dibadda ee Maraykanku ay si rasmi ah ugu dhawaaqday in Suuriya laga saaray liiska dalalka taageera argagixisada, iyadoo ay Wasaaradda Maaliyaduna tallaabadaas taageertay oo ay liiska madow ka saartay jabhaddii HTS, lana buriyay dhammaan xayiraadihii argagixiso ee saarnaa.
Suuriya ayaa liiskan lagu daray tan iyo sanadkii 1979-kii, waxaana xukuumadda Dimishiq ay haatan aaminsan tahay in go'aankani uu waddada u xaarayo in dalka la geliyo maalgashi iyo inuu caalamka la yeesho xiriir ganacsi.
