Maleeshiyada RSF ayaa sheegtay inay la wareegeen gacan-ku-haynta laba deegaan oo ka tirsan gobolka Waqooyiga Darfur ee galbeedka Suudaan.
Ilo maxalli ah ayaa u sheegay Anadolu in ciidamada RSF oo wata tobannaan gaadiidka dagaalka ah ay galeen deegaanka Abu Qamra, oo qiyaastii 200 kiiloomitir waqooyi-galbeed kaga beegan caasimadda gobolka ee El-Fasher.
Deegaankan ayaa horey ugu jiray gacanta ciidamada milateriga Suudaan iyo xoogag la safan.
Sida ay ilo wareedku sheegeen, ciidamada RSF ayaa sidoo kale weerar ku qaaday magaalada Ambro, oo qiyaastii 300 kiiloomitir waqooyi-galbeed kaga beegan El-Fasher.
Maleeshiyada RSF ayaa bayaan ay soo saartay ku sheegtay in dagaalyahannadeedu ay “si buuxda u xoojiyeen gacan-ku-haynta” labadaas deegaan.
Ciidamada RSF ayaa baraha bulshada ku baahiyay muuqaallo la rumeysan yahay inay muujinayaan joogitaankooda labada goobood.
Illaa hadda wax war ah kama soo bixin ciidamada milateriga Suudaan oo ku saabsan sheegashadaasi.
18-ka gobol ee Suudaan, RSF waxay maamushaa dhammaan shanta gobol ee Darfur ee galbeedka dalka, marka laga reebo qaybo ka mid ah Waqooyiga Darfur oo weli ay gacanta ku hayaan ciidamada dowladda. Dhanka kale, milateriga Suudaan ayaa gacanta ku haya inta badan 13-ka gobol ee kale ee koonfurta, waqooyiga, bariga iyo bartamaha dalka, oo ay ku jirto caasimadda Khartoum.
Dagaalka u dhexeeya ciidamada milateriga Suudaan iyo RSF, oo billowday bishii Abriil 2023, ayaa sababay dhimashada kumannaan qof iyo barakaca malaayiin kale.
