Wasiirka Arrimaha Dibadda Turkiga Hakan Fidan ayaa ka qeyb galay kulan ay yeesheen wasiirrada arrimaha dibadda ee Turkiga, Masar, Pakistan iyo Sacuudi Carabiya oo Axaddii ka dhacay Islamabad.
Sida ay sheegeen ilo diblomaasiyadeed oo Turki ah, kulanka ayaa diiradda lagu saaray xaaladda ugu dambeysay ee Bariga Dhexe xilli uu hal bil gaaray dagaalka Maraykanka iyo Israa’iil ee ka dhanka ah Iiraan.
Fidan ayaa gaaray caasimadda Pakistan si uu uga qeyb galo wada-hadallo soconaya laba maalmood oo ku saabsan arrimaha gobolka.
Booqashadan ayaa imaneysa iyadoo Turkiga, Pakistan iyo Masar ay sii wadaan dadaallada diblomaasiyadeed ee lagu doonayo in lagu soo afjaro colaadda socota.
Maraykanka iyo Israa’iil ayaa tan iyo 28-kii Febraayo fulinayay duqeymo cirka ah oo ka dhan ah Iiraan, iyadoo la sheegay in ay ku dhinteen in ka badan 1,300 qof.
Iiraan ayaa kaga jawaabtay weerarro drones iyo gantaallo ah oo ay ku beegsatay Israa’iil, Urdun, Ciraaq iyo dalalka Khaliijka ee martigeliya saldhigyada milatari ee Maraykanka, taasoo sababtay khasaare, burbur kaabayaal iyo carqaladeyn ku timid suuqyada caalamka iyo duulimaadyada.
