Lix qof ayaa lagu dilay magaalada Qom ee dalka Iiraan kadib markii goobo kala duwan ay la kulmeen weerarro ay fuliyeen Maraykanka iyo Israa’iil, sida ay habeenkii Khamiista werisay warbaahinta Iiraan.
Bogga wararka ee Jamaran ayaa sheegay in Guddoomiye Ku-xigeenka Qom Morteza Heidari uu bayaan uu soo saaray ku sheegay in ugu yaraan lix qof ay dhinteen kadib markii saddex dhisme oo degaan ah lagu beegsaday aagga Pardisan ee Qom, isagoo intaas ku daray in tirada dhaawacyada aan weli la caddeyn.
Kanaalka rasmiga ah ee Telegramka ee Ciidanka Ilaalada Kacaanka Iiraan ayaa sidoo kale xaqiijiyey “shahiididda lix muwaadin” kadib weerar lagu qaaday deegaan rayid ah oo ku yaalla Qom.
Sida lagu sheegay qoraalka, saddex guri oo degaan ah ayaa ku burburay aagga Pardisan kadib waxa uu ku tilmaamay weerar gardarro ah oo ay fuliyeen Maraykanka iyo Sahyooniyiinta, iyadoo tirada dhaawacyada weli aan la ogayn.
Dhanka kale, Hamid Safari, oo ah agaasimaha guud ee maaraynta musiibooyinka ee gobolka Galbeedka Azerbaijan, ayaa u sheegay wakaaladda wararka ee IRNA in afar dhisme oo rayid ah ay ku burbureen weerar lagu qaaday magaalada Urmia, iyadoo la sheegay inuu jiro khasaare nafeed.
War kale oo ay daabacday Nournews ee Iiraan ayaa sheegay in magaalooyinka Tehran, Isfahan, Kashan, Yazd, Qom, Tabriz iyo Ahvaz ay la kulmeen duqeymo cirka ah habeenkii Khamiista.
