Iiraan ayaa oggolaatay in 20 markab oo dheeraad ah oo wata calanka Pakistan ay maraan marinka Hormuz, kaasoo xirnaa toddobaadyadii la soo dhaafay.

Wasiirka Arrimaha Dibadda Pakistan Ishaq Dar ayaa xaqiijiyay tallaabadan isagoo qoraal ku daabacay bartiisa X, wuxuuna ku tilmaamay tallaabo dhisaysa kalsooni oo mudan in la bogaadiyo.

“Tani waa astaan nabadeed waxayna ka caawin doontaa in la xasiliyo gobolka,” ayuu yiri.

“Wadahadal, diblomaasiyad iyo tallaabooyinka noocan oo kale ah ee dhisaya kalsoonida ayaa ah jidka kaliya ee horay loo mari karo,” ayuu raaciyay.

Pakistan ayaa la filayaa inay martigeliso kulan afar geesood ah oo looga hadlayo dagaalka Bariga Dhexe Axadda.

Wasiirrada arrimaha dibadda ee Turkiga, Pakistan, Masar iyo Sacuudi Carabiya ayaa la filayaa inay ku kulmaan Islamabad si ay uga wada hadlaan dadaallada lagu yareynayo xiisadaha sii kordhaya ee gobolka, iyadoo dagaalka Maraykanka iyo Israa’iil ku qaadeen Iiraan uu galay bishii labaad.

Marinka Hormuz ayaa si wax ku ool ah u xirnaa tan iyo bilowgii Maarso kadib markii uu sii xoogaystay dagaalka u dhexeeya Maraykanka, Israa’iil iyo Iiraan oo billowday 28-kii Febraayo.

Ka hor dagaalka, celcelis ahaan 138 markab ayaa maalin kasta marayay marinkan.