Dowladda Federaalka Soomaaliya iyo Jamhuuriyadda Islaamiga ah ee Pakistan ayaa Talaadadii kala saxiixday Heshiis Is-afgarad (MoU) oo lagu xoojinayo iskaashiga laba geesoodka ah ee dhinacyada difaaca, amniga iyo horumarinta awoodda ciidamada.
Heshiiska ayaa magaalada Islamabad waxaa ku kala saxiixday Wasiirka Gaashaandhigga Soomaaliya, Axmed Macallin Fiqi, oo hoggaaminaya wafdi rasmi ah oo booqasho ku jooga Pakistan, iyo Wasiirka Gaashaandhigga Pakistan, Khawaja Muhammad Asif.
Sida ku cad Heshiiska Is-afgaradka, labada dal waxay xoojin doonaan iskaashiga dhinacyada la-dagaallanka argagixisada, tababarka ciidamada, is-weydaarsiga khibradaha iyo aqoonta xirfadeed, dhismaha awoodda difaaca, iyo iskaashi ballaaran oo dhinaca amniga ah si loo taageero dadaallada lagu horumarinayo nabadda iyo xasilloonida.
Heshiiskan ayaa ka tarjumaya sida ay Soomaaliya iyo Pakistan uga go’an tahay xoojinta iskaashigooda istaraatiijiga ah iyo ballaarinta wada shaqeynta dhinacyada difaaca iyo amniga, isaga oo saldhig u noqonaya iskaashi dhow oo u adeegaya danaha ay wadaagaan labada dal.
