Ra'iisul Wasaaraha Xukuumadda Federaalka Soomaaliya, Xamse Cabdi Barre, ayaa ugu baaqay hoggaanka Somaliland inay dib uga fiirsadaan jiidada cusub ee ay u weecdeen dhinaca xiriirka arrimaha dibadda, gaar ahaan xiriirka ay la sameeyeen Israa'iil, isagoo ku adkeystay in khilaafaadka Soomaalida lagu xallin karo oo keliya wada-hadal iyo dib-u-heshiisiin.
Ra'iisul Wasaaraha ayaa hadalkan ka jeediyay magaalada Laascaanood intii lagu guda jiray munaasabadda sannad-guurada koowaad ee kasoo wareegtay aasaaska Maamulka Waqooyi Bari.
Wuxuu halkaas ka caddeeyay in Dowladda Federaalka ay weli ku taagan tahay mabaadi'da Islaamnimada, walaaltinimada iyo Soomaalinimada, isla markaana ay diyaar u tahay in wixii qaladaad ah ee dhacay lagu saxo wada-hadal nabadeed oo miiska dushiisa ah.
Midnimada iyo xiriirka bulshada
Intii uu khudbadda jeedinayay, Ra'iisul Wasaaruhu wuxuu tilmaamay in dadka Soomaaliyeed ay yihiin hal ummad oo aan marnaba kala maarmin.
Wuxuu xusay in magaalooyinka Laascaanood iyo Hargeysa ay labaduba yihiin magaalooyin Soomaaliyeed, isla markaana kala duwanaanshaha siyaasadeed uusan marnaba beddeli karin xiriirka qoys, qaraabo iyo walaaltinimo ee qotada dheer ee bulshada ka dhexeeya.
Dhaliisha go'aannada Somaliland
Isagoo la hadlayay dhinaca Somaliland, wuxuu sheegay in hoggaanku uu qaatay "jiho khaldan", isagoo si gaar ah u dul istaagay cilaaqaadka ay la yeesheen Israa'iil.
Wuxuu ku dooday in go'aannadaas aysan metelin aragtida guud ee shacabka Soomaaliyeed, culimada, siyaasiyiinta, waxgaradka iyo guud ahaan bulshada Muslimiinta.
Wuxuu ugu baaqay maamulka Somaliland inay dib uga soo laabtaan jidkaas qaladka ah, isagoo ku adkeystay in albaabka dib-u-heshiisiintu uu weli furan yahay, fursadna ay u haystaan inay ka laabtaan go'aankaas.
Baaqa tanaasulka ee Waqooyi Bari
Dhanka kale, Ra'iisul Wasaare Xamse Cabdi Barre wuxuu farriin dhiirrigelin ah u diray shacabka iyo maamulka Waqooyi Bari, isagoo ku boorriyay inay mudnaanta siiyaan tanaasulka, nabadda iyo xaqiiqada dhabta ah, halkii laga sii hurin lahaa dareen caadifadeed iyo kala fogaansho bulsho.
Wuxuu labada dhinacba ugu baaqay inay dib u soo nooleeyaan wada-hadalladii nabadda, ayna hawlgeliyaan guddiyadii la dhisay iyo doorkii madaxda dhaqanka si loo soo afjaro khilaafka dhiiggu ku daatay.
Gaba-gabadii, Ra'iisul Wasaaraha ayaa sheegay in Dowladda Federaalka ay aaminsan tahay in Soomaalinimada iyo midnimada qaranku ay yihiin waddada keliya ee lagu gaari karo xal waara, isagoo xusay in xoojinta nabadda iyo walaaltinimadu ay tahay mid u adeegaysa danta shacabka Waqooyi Bari iyo guud ahaan Soomaaliya.
