Wasiirka Tamarta iyo Kheyraadka Dabiiciga ah ee Turkiga, Alparslan Bayraktar, iyo wafdi uu hoggaaminayo ayaa maanta gaaray caasimadda Soomaaliya ee Muqdisho isagoo halkaas uu ku soo dhaweeyay dhiggiisa Wasiirka Batroolka iyo Kheyraadka Macdanta, Daahir Shire.
Diyaaradda wafdiga ayaa ka degatay garoonka diyaaradaha caalamiga ah ee Aadan Cadde, iyadoo loo sameeyay soo dhoweyn rasmi ah.
Imaatinka wafdiga Turkiga ayaa ujeedkiisu yahay ka qeybgalka munaasabadda lagu soo dhoweynayo markabka qodista shiidaalka “Çağrı Bey,” oo shalay 9-kii Abriil 2026 ku xirtay dekedda Muqdisho, taasoo muujinaysa xoojinta iskaashiga labada dal ee dhinaca tamarta.
Wasiir Bayraktar ayaa Muqdisho kulan kula qaatay Madaxweynaha Soomaaliya Xasan Sheekh Maxamuud, isagoo ammaanay iskaashiga dhinaca tamarta ee labad dal, taasoo ka dhalatay dadaalka iyo rabitaanka adag ee uu muujiyay Madaxweynaha Jamhuuriyadda Turkiga Mudane Recep Tayyip Erdogan.
Kadib sahankii hordhaca ahaa ee uu bilaabay markabka Oruç Reis, waxaa xigi doona hawlgalka qodista shiidaalka ee ugu horreysa ee nooceeda ah ee ka bilaaban doonta ceelka Curad-1 iyadoo uu fulinayo markabka Çağrı Bey.
Waxaa la filayaa in munaasabad rasmi ah oo arrintan la xiriirta ay ka dhacdo dekedda Muqdisho goor dambe oo maanta ah.
“Waxaan aaminsanahay in iskaashigan u dhexeeya Turkiga iyo Soomaaliya, oo ku dhisan kalsooni, walaaltinimo iyo faham wadajir ah oo horumar, uu furi doono bog cusub oo xooggan oo ku saabsan xiriirka labada dal.
