Xoghayaha Guud ee Qaramada Midoobay, Antonio Guterres, ayaa muujiyay walaac qoto dheer oo ku aaddan warbixinnada muujinaya weerarro salka ku haya ajnabi-nacayb oo ka dillaacay gobolka KwaZulu-Natal ee dalka Koonfur Afrika.

Xoghayaha ayaa si adag u cambaareeyay falalka dambiyada ah ee ay geysanayaan kooxo abaabulan oo hurinaya rabshado, kuwaas oo dhibaatadooda marmarsiiyo uga dhiganaya xaaladaha dhaqaale-xumo iyo shaqo-la’aanta ee dalkaas ka jira.

Bayaan uu soo saaray, oo uu sidoo kale ugu hambalyeynayay shacabka Koonfur Afrika xuska Maalinta Xorriyadda, ayuu Guterres ku caddeeyay in rabshadaha, gacan-qaadka ula-kaca ah, iyo nooc kasta oo hurin nacayb ah aysan boos ku lahayn bulsho dimuqraadi ah oo xaqdhawrta sarraynta sharciga iyo xuquuqda aadanaha.

Hadalkiisa ayaa daba-socda xaalado kacsanaan ah oo ka taagan gobolkaas, halkaas oo si gaar ah loogu beegsaday muwaadiniin u dhashay dalka Ghana iyo dalal kale oo Afrikaan ah, iyadoo lagu dhibaateynayo heerka sharci ee ay dalkaas ku joogaan.

Xukuumadda Koonfur Afrika, gaar ahaan Wasaaradda Booliska, ayaa dhankeeda si buuxda isaga fogaysay weerarradan, iyadoo ku tilmaantay kuwo si toos ah uga hor imaanaya qiyamkii iyo mabaadi’dii lagu aasaasay dimuqraadiyadda dalkaas.

Guterres ayaa xusuusiyay madaxda iyo shacabka in halgankii taariikhiga ahaa ee ay Koonfur Afrika kula jirtay nidaamkii midab-takoorka ee ‘Apartheid’ lagu guuleystay iyadoo la helay is-garabtaag iyo midnimo caalami ah, gaar ahaan tii qaaradda Afrika.

Wuxuu hoosta ka xarriiqay in, in kasta oo la fahamsan yahay caqabadaha dhaqaale ee bulshada haysta, haddana xallinta cabashooyinka ay tahay in loo maro waddo sharci ah oo ka madax-bannaan takoor iyo beegsi ajnabi.