Toddobo qof, oo ay ku jiraan laba ka mid ah shaqaale caafimaad, ayaa lagu dilay halka 11 kale ay ku dhaawacmeen weerar drone ah oo ay fuliyeen maleeshiyada RSF oo lagu qaaday isbitaal ku yaalla gobolka Niilka Cad ee koonfurta Suudaan, sida ay Khamiistii sheegeen Shabakadda Dhaqaatiirta Suudaan.
Bayaan ay soo saartay Shabakadda Dhakhaatiirta Suudaan, oo ah hay’ad aan dowladeed ahayn, ayaa lagu cambaareeyay weerarka lagu qaaday Isbitaalka Al-Jabalain, iyadoo lagu tilmaamay “weerar ula kac ah oo lagu beegsaday kaabayaasha caafimaadka iyo rayidka” iyo “xadgudub cad oo ka dhan ah xeerarka bani’aadamnimo iyo sharciga caalamiga ah.”
Waxay ka digtay in weerarku uu yahay “koror khatar ah” oo ku yimid weerarrada halista gelinaya waxa ka haray nidaamka caafimaadka Suudaan iyadoo xaaladda ay sii xumaanayso.
Waxay ku eedeysay kooxda fallaagada “mas’uuliyad buuxda” ee weerarka, waxayna ugu baaqday bulshada caalamka inay tallaabo qaadaan si loo joojiyo xadgudubyada noocan ah loona hubiyo ilaalinta xarumaha caafimaadka iyo shaqaalaha ku shaqeynaya xaalado bani’aadamnimo oo aad u adag.
Ma jirin wax jawaab degdeg ah oo ka soo baxay RSF oo ku saabsan warbixintan.
Tan iyo Abriil 2023, ciidamada Suudaan iyo RSF ayaa ku lug leh dagaal ka dhashay qorshe lagu doonayay in ciidamada RSF lagu daro milatariga. Dagaalkan ayaa sababay mid ka mid ah qalalaasaha bani’aadamnimo ee ugu xun dunida, iyadoo tobanaan kun la dilay ku dhowaad 13 milyan oo qofna ay barakaceen.
