Masar ayaa beenisay inay farageliso arrimaha gudaha ee dal kale, kaddib eedeymo uga yimid Itoobiya oo ku saabsan inay taageerto kooxo hubeysan oo ku sugan waqooyiga dalkaas.
“Siyaasadda arrimaha dibadda Masar waxay ku dhisan tahay mabaadi’ adag, waxaana ugu horreeya ixtiraamka madaxbannaanida dowladaha, midnimadooda iyo wadajirka dhuleed, iyo inaan la faragelin arrimaha gudaha ee dalalka kale,” ayuu Afhayeenka Wasaaradda Arrimaha Dibadda Nader Zaki ku sheegay qoraal uu fiidnimadii Isniinta ku daabacay barta X ee shirkadda Mareykanka laga leeyahay.
“Sidaas darteed, sheegasho kasta oo shaki gelinaysa sida Masar uga go’an tahay mabaadi’dan salka adag leh waa waxba kama jiraan,” ayuu raaciyay.
Zaki ma uusan magacaabin dalka ama dhinaca ka dambeeyay sheegashooyinka.
Dagaallo Culus oo Dib u Qarxay
Taliyaha Ciidamada Itoobiya, Field Marshal Birhanu Jula, ayaa horay Suudaan, Masar iyo dhinacyo kale ugu eedeeyay inay taageerayaan kooxaha hubeysan ee la dagaallamaya ciidamadiisa waqooyiga dalka, kaddib markii ay dib u qarxeen dagaallo culus oo u dhexeeya fallaagada Jabhadda Xoreynta Shacabka Tigray (TPLF) iyo dowladda federaalka.
Itoobiya waxaa intii u dhexeysay 2020 iyo 2022 ka dhacay dagaal dhimasho badan sababay oo u dhexeeyay ciidamada federaalka iyo fallaagada TPLF, kaas oo ay ku dhinteen ugu yaraan 600,000 oo qof, sida uu sheegay Midowga Afrika, ka hor inta aysan labada dhinac saxiixin Heshiiskii Pretoria ee lagu soo afjarayay colaadda.
