Amurka ta bayyana ranar Laraba cewa za ta sauƙaƙa tsarinta na buƙatar biyan kuɗaɗen jingina ga masu neman izinin shiga ƙasarta ga wasu magoya bayan tawagogin ƙasashe a gasar cin kofin duniya.

A ƙarƙashin ɗaya daga cikin tsare-tsaren Shugaba Donald Trump domin daƙile shiga ƙasar, Amurka ta fara neman mutane daga ƙasashe hamsin su miƙa kuɗi daga $5,000 zuwa $15,000 domin samun bizar shiga Amurka, kuɗin da za a iya mayar musu da zarar sun koma ƙasashensu.

Ma’aikatar harkokin wajen Amurka ta ce za ta ɗauke kuɗaɗen jingina ga ‘yan tawagogin da za su fafata a wasannin gasar cin kofin duniya tare da magoya baya daga ƙasashen da za su fafata da suka riga suka samu tikiti kuma suka yi rajista wa tsarin ba da fifiko da aka tsara wa ba da biza.

Ƙasashen Afirka biyar da suka samu shiga gasar cin kofin duniyar suna cikin ƙasashen da ‘ya’yansu ke da buƙatar biyan kuɗaɗen jingina na biza : Aljeriya da Cape Verde da Ivory Coast da Senegal da Tunisiya.

"Mun duƙufa wajen mayar da hankali kan ƙarfafa tsaron ƙasar Amurka yayin ba da damar damar tafiya da ta dace da doka game da gasar cin kofin duniya da ke tafe," a cewar Mora Namdar, mataimakiyar sakataren harkokin wajen ƙasar da ke lura da batutuwa na jadakanci.

‘Gasar cin kofin duniya ta FIFA da ta fi ko wace’

Ta ce gwamnatin Trump tana son ta shirya "gasar cin kofin duniya ta FIFA mafi ƙayartawa da kuma mafi girma a tarihi."

"Sanarwar yau daga ma’aikatar harkokin waje ta Amurka ta kuma nuna haɗin gwiwar da muke da gwamnatin Amurka da kwamiti na musamman na fadar White House kan gasar cin kofin duniya ta FIFA domin samar da wani taron duniya mai cike da nasara da zai kafa tarihi wanda kuma ba za a manta da shi ba," kamar yadda wani mai magana da yawun hukumar ƙwallon ƙafa ta duniya FIFA ya bayyana a wata sanarwa.

Gwamnatin Trump ta kuma faɗaɗa bincike sosai kan baƙi daga ƙasashen yammacin duniya da ke ƙawayen ƙasar , tana mai buƙatar su su bai wa gwamnatin Amurka damar duba ababen da suka wallafa a shafukansu na sada zumunta .

Gasar cin kofin duniya , wadda za a fara ranar 11 ga watan Yuni, ƙasashen Kanada da Meziko da Amurka ne za su karɓi baƙuncinta tare.