Fafaroma Leo XIV ya yi gargadi a ranar Lahadi cewa Allah "ba ya sauraron addu'ar waɗanda suke ƙaddamar da yaƙi" yayin da rikici a Gabas ta Tsakiya ke ci gaba da ta’azzara a ɓangarori da dama.
“Haka Ubangijinmu yake... Ubangiji wanda ba ya son yaki... wanda ba ya sauraron addu'ar waɗanda ke yin yaƙi,” ya faɗa a yayin wa'azin da ya gabatar a ranar Lahadi, na Palm Sunday.
Bayan addu'ar Angelus, ya yi ta'aziyya ga waɗanda rikici ya shafa a Gabas ta Tsakiya, "wadanda ke shan wahalar sakamakon mummunan rikici kuma a lokuta da dama ba za su iya gudanar da cikakkiyar ibada na waɗannan ranakun masu tsarki ba."
A farkon wannan makon, Fafaroma ya yi kira ga tsagaita wuta a rikicin Gabas ta Tsakiya, yana cewa an tilasta wa fiye da mutum miliyan ɗaya barin gidajensu kuma ya roƙi ɓangarorin da ke yaki su zauna su sasanta.
Ya yi kira da a yi sulhu
Leo XIV, fafaroma na farko daga Amurka, ya sha yin Allah wadai da yaƙi kuma ya yi kira ga tattaunawa.
Amma fafaroman mai shekaru 70 ya kasance mai taka tsantsan a cikin bayanansa tun bayan harin da Amurka da Isra'ila suka kai kan Iran wanda ya ƙaddamar da yaki a 28 ga Fabrairu, inda ya nisanci ambaton sunan kowane ɓangare a cikin Allah wadai da roƙonnin zaman lafiya da yake yawan yi.
