Kwamitin bincike da gwamnati ta kafa a ranar Alhamis ya ce rikicin zaɓe a ƙasar Tanzania a bara ya yi sanadiyyar mutuwar aƙalla mutane 518.

An ayyana shugaba Samia Suluhu Hassan a matsayin wadda ta lashe zaɓen ranar 29 ga Oktoba da kashi 98 cikin 100 na ƙuri'un da aka kaɗa bayan da aka hana manyan 'yan adawa tsayawa takara.

Amma zaɓen ya haifar da zanga-zanga a faɗin ƙasar tsawon kwanaki da dama.

'Yan adawa da ƙungiyoyin addini sun ce an kashe dubban mutane, tare da rahotannin cewa an samu kaburburan da aka binne mutane da yawa da ƙwace gawarwaki daga ɗakunan ajiyarsu na asibiti.

Gwamnati ba ta bayar da wani adadi na waɗanda suka mutu ba har zuwa ranar Alhamis, kuma kwamitin ya gano cewa "ba za a iya tabbatar da zargin wanzuwar kaburburan da aka binne mutane da yawa ba".

‘Hotuna da aka ƙirƙira’

"Jimillar mace-macen da aka samu sakamakon babban zaɓen sun kai 518, waɗanda 490 daga ciki maza ne," in ji Mohamed Chande Othman, shugaban kwamitin da Shugaba Saluhu Hassan ta kafa, amma ya ce adadin "ba na ƙarshe ko kuma kammalalle ba ne".

"Hotunan da aka yaɗa a intanet, wasu daga cikinsu na gaske ne, yayin da wasu... an ƙirƙire su ne ta amfani da fasahar zamani ta AI," in ji Othman.

Katsewar intanet a lokacin da kuma bayan zaɓen ya rikitar da ƙoƙarin tabbatar da girman tashin hankalin.

'Yan adawa sun ce binciken "ba zai iya zama mai zaman kansa ko kuma marar son kai ba, musamman a yanayin da gwamnati ke kan gaba wajen aikata laifukan da ake bincike a kansu".

Tashin hankalin ya haifar da suka mai tsanani daga masu sa ido na Afirka, inda Tarayyar Afirka ta ce zaɓen bai bi ƙa'idojin zaɓen dimokuraɗiyya ba."