Baraza la wazee wa mahakama la Las Vegas limempata na hatia Duane “Keffe D” Davis, ya kuhusika katika mauaji ya mwanamuziki mashuhuri wa hip-hop Tupac Shakur.
Uamuzi huo umehitimisha kesi iliyodumu kwa takribani miongo mitatu tangu Tupac kuuawa mwaka 1996, na kuifanya kuwa mojawapo ya kesi za mauaji zilizodumu kwa muda mrefu katika historia ya muziki wa hip-hop.
Davis, mwenye umri wa miaka 63, alikuwa akikabiliwa na shtaka la mauaji yaliyohusisha matumizi ya silaha hatari katika Kaunti ya Clark, jimbo la Nevada. Baraza hilo lilifikia uamuzi wake ndani ya muda usiozidi saa tatu.
Waendesha mashtaka walidai kuwa Davis alikuwa mmoja wa watu waliopanga na kuratibu mauaji ya Tupac, ambaye wakati huo alikuwa na umri wa miaka 25.
Kwa mujibu wa mashtaka, mauaji hayo yalitokana na kulipiza kisasi baada ya Tupac na watu waliokuwa pamoja naye kumpiga mpwa wa Davis katika kasino moja huko Las Vegas.
Mzozo wa Casino 1996
Mnamo Septemba 7, 1996, Tupac na kundi lake walihusika katika ugomvi uliotokea kwenye kasino huko Las Vegas. Katika tukio hilo, mpwa wa Davis alipigwa na watu waliokuwa pamoja na Tupac.
Baada ya tukio hilo, Davis alikasirika na baadaye akaondoka pamoja na wanaume wengine watatu, akiwemo mpwa wake, wakiwa katika gari aina ya Cadillac nyeupe. Lengo lao lilikuwa kumtafuta Tupac pamoja na Marion “Suge” Knight, mmoja wa viongozi wa kampuni ya Death Row Records.
Davis alikiri kwamba aliwapatia watu waliokuwa kwenye kiti cha nyuma cha gari bunduki. Baadaye, gari lao lilipofika karibu na gari lililokuwa limewabeba Tupac na Suge Knight, mmoja wa watu waliokuwa nyuma alifyatua risasi.
Tupac alijeruhiwa vibaya na baadaye akafariki kutokana na majeraha hayo.
Ingawa Davis alipatikana na hatia ya mauaji, waendesha mashtaka hawakudai kwamba yeye ndiye aliyefyatua risasi iliyomuua Tupac.
Badala yake, walidai kuwa alikuwa sehemu muhimu ya mpango wa mauaji. Chini ya sheria ya Nevada, mtu anaweza kuwajibishwa kisheria kwa mauaji ikiwa alishiriki katika kupanga au kuwezesha uhalifu huo, hata kama si yeye aliyefyatua risasi.
Hadi sasa, waendesha mashtaka hawajamtaja rasmi mtu aliyefyatua risasi.
Wanaume wengine watatu waliokuwa ndani ya gari hilo wamefariki tangu tukio hilo litokee, hivyo hawakuweza kutoa ushahidi mahakamani.
Ushahidi uliotumika dhidi ya Davis
Kwa miaka mingi, polisi walikuwa wakimshuku Davis kuhusiana na mauaji hayo, lakini hawakuwa na ushahidi wa kutosha wa kumfungulia mashtaka.
Hata hivyo, hali ilibadilika baada ya Davis kuanza kuzungumza hadharani kuhusu kile kilichotokea kupitia mahojiano mbalimbali na kitabu chake cha kumbukumbu.
Waendesha mashtaka pia waliwasilisha mahakamani rekodi za mazungumzo ya Davis na wachunguzi. Mazungumzo hayo yalikuwa sehemu muhimu ya ushahidi uliotumika katika kesi hiyo.
Kwa upande mwingine, wakili wa Davis alidai kuwa kauli za mteja wake zilikuwa ni majigambo tu, na kwamba hazikuungwa mkono na ushahidi huru wa kutosha.
Chanzo cha uhasama
Davis alikuwa kiongozi wa Southside Compton Crips, genge la Los Angeles lililokuwa katika mzozo na Mob Piru, kundi lililohusishwa na Tupac na Death Row Records.
Migogoro hiyo ya magenge ilikuwa na ushindani mkubwa uliokuwepo katika muziki wa hip-hop kati ya East Coast na West Coast katika miaka ya 1990.
Tupac alikuwa mmoja wa wasanii waliofanikiwa zaidi kibiashara na wenye ushawishi mkubwa katika historia ya muziki wa rap. Kifo chake akiwa na umri wa miaka 25 kilitikisa dunia ya muziki na kuacha alama kubwa katika historia ya hip-hop.
