Madaxweyne Xi Jinping ayaa Sabtidii ku dhawaaqay in Beijing ay laga bilaabo 1-da Maayo dhaqangelin doonto canshuur dhaaf loo sameynayo badeecadaha laga keeno dhammaan dalalka Afrika marka laga reebo hal dal, sida ay baahisay warbaahinta dowladda Shiinaha.

Shiinaha ayaa hore u lahaa siyaasad canshuur eber ah oo quseysa badeecadaha laga keeno 33 dal oo Afrikaan ah, balse sannadkii hore Beijing waxay sheegtay inay qorsheyneyso in siyaasaddaas lagu ballaariyo dhammaan 53 dal ee ay xiriirka diblomaasiyadeed la leedahay qaaradda.

Shiinaha waa saaxiibka ganacsi ee ugu weyn Afrika, wuxuuna taageero weyn ka geystaa mashaariicda waaweyn ee kaabayaasha ee gobolka isaga oo adeegsanaya hindisihiisa ballaaran ee “Belt and Road.”

Laga bilaabo 1-da Maayo, canshuur dhaaf dhamaystiran (eber) ayaa lagu dabaqi doonaa dhammaan dalalka Afrika marka laga reebo Eswatini, oo xiriir diblomaasiyadeed la leh Taiwan. Shiinaha wuxuu ku andacoodaa in jasiiraddani ay qayb ka tahay dhulkiisa, isagoon meesha ka saarin adeegsiga awood si uu ula wareego.

Dalal badan oo Afrikaan ah ayaa sii kordhinaya u jeesashadooda Shiinaha iyo saaxiibbo kale oo ganacsi, kaddib markii Madaxweyne Donald Trump uu sannadkii hore canshuuro culus ku soo rogay dalal badan oo caalamka ah.

Xi ayaa sheegay in heshiiska canshuur dhaafka ah “uu shaki la’aan fursado cusub u abuuri doono horumarinta Afrika,” isagoo ku dhawaaqay tallaabadan xilli hoggaamiyeyaasha qaaradda ay ku shirsan yihiin Itoobiya kulanka sannadlaha ah ee Midowga Afrika.