Dowladda Jamhuuriyadda Federaalka Soomaaliya ayaa si kulul u cambaaraysay dhawaaqii ugu dambeeyay ee ka soo yeeray Wasaaradda Arrimaha Dibadda Israa’iil, kaas oo ku saabsanaa magacaabista wakiil diblomaasiyadeed oo loo diro gobollada waqooyi ee dalka.

Dowladda ayaa tilmaamtay in go’aankani uu si cad uga hor imaanayo sharciga caalamiga ah, Axdiga Qaramada Midoobay, iyo mabaadi’da aasaasiga ah ee Midowga Afrika, kuwaas oo dhammaantood Soomaaliya u aqoonsan dal keliya oo madax-bannaan, midaysan, aanan la kala qaybin karin gudaha xuduudihiisa caalamiga ah ee la aqoonsan yahay.

“Dowladda Federaalka Soomaaliya waxay si buuxda u diiddan tahay isku-day kasta oo aqoonsi diblomaasiyadeed ama siyaasadeed lagu siinayo qayb ka mid ah dhulkeeda oo ka baxsan awoodda Dowladda Federaalka,” ayaa lagu yiri bayaanka Wasaaradda Arrimaha Dibadda iyo Iskaashiga Caalamiga ee Soomaaliya..

Waxa ay dowladdu hoosta ka xarriiqday in Somaliland ay tahay qayb laxaad leh oo ka mid ah Jamhuuriyadda, qorshe kasta oo lagu muujinayo in ay tahay maamul gaar ah oo madax-bannaanina uusan lahayn wax sal sharci ah, isla markaana uu wiiqayo is-afgaradka caalamiga ah ee jira.

Xilli ay Soomaaliya si dhow ula shaqaynayso saaxiibbadeeda caalamka si ay u xoojiso hay’adaha dowladda, u ballaariso dimuqraadiyadda, u horumariso dib-u-heshiisiinta qaranka, isla markaana ula dagaallanto argagixisada, dowladda ayaa xustay in ficillada noocan ah ay halis gelinayaan xasiloonida iyo horumarka gobolka, ayna dhiirrigelinayaan fikradaha kala qaybinta.

Jamhuuriyadda Federaalka Soomaaliya ayaa ugu baaqday dowladda Israa’iil in ay dib u eegis ku samayso, kana noqoto go’aankan, isla markaana si buuxda u ixtiraamto madax-bannaanida siyaasadeed iyo wadajirka dhuleed ee Soomaaliya.

Sidoo kale, Soomaaliya ayaa qaylo-dhaan u dirtay Midowga Afrika, Qaramada Midoobay, Jaamacadda Carabta, Ururka Iskaashiga Islaamka, Midowga Yurub, iyo guud ahaan beesha caalamka, iyadoo ugu baaqday in ay difaacaan sharciga caalamiga ah, kana hortagaan tallaabo kasta oo wiiqi karta midnimada Soomaaliya ama sharciyayn karta sheegashooyinka gooni-goosadka.

Ugu dambeyn, Dowladda Soomaaliya ayaa adkaysay go’aankeeda adag ee ah in ay isticmaali doonto dhammaan waddooyinka diblomaasiyadeed, kuwa siyaasadeed, iyo kuwa sharci ee la jaanqaadaya xeerarka caalamiga ah si ay u ilaaliso midnimadeeda qaran iyo xuquuqdeeda madax-bannaan.