Madaxweynaha Maraykanka Donald Trump ayaa habeenkii Arbacada sheegay in Maraykanku sii wadi doono joogitaankiisa militari ee xooggan ee gudaha iyo agagaarka Iiraan ilaa “heshiis dhab ah” si buuxda loo hirgeliyo, isagoo ka digay jawaab culus haddii aan la fulin ballanqaadyada.
Bayaan uu ku daabacay bartiisa Truth Social, Trump ayaa sheegay in dhammaan maraakiibta, diyaaradaha iyo ciidamada Maraykanka, oo ay la socdaan hub iyo rasaas dheeraad ah, ay “sii joogi doonaan gudaha iyo agagaarka Iiraan ilaa heshiiska DHABTA AH ee la gaaray si buuxda loo fuliyo.”
“Haddii sabab kasta awgeed aan sidaas loo sameyn, taasoo aad u yar, markaas ‘rasaastu way bilaaban doontaa,’ si ka weyn, ka wanaagsan, kana xoog badan sidii hore loo arag,” ayuu yiri.
Wuxuu intaas ku daray in heshiis ku saabsan “in aan la yeelan hub nukliyeer ah” horey loo gaaray “waqti dheer ka hor,” isagoo diiday “dhammaan hadallada been abuurka ah ee ka soo horjeeda.”
“Ma jiri doonaan hub nukliyeer ah, marin-biyoodka Hormuzna wuu furnaan doonaa oo ammaan ayuu ahaan doonaa,” ayuu yiri.
“Dhanka kale, militarigeenna weyn ayaa isu diyaarinaya isla markaana nasanaya, isagoo xitaa rajeynaya howlgalka xiga,” ayuu ku daray.
Iiraan iyo Maraykanka ayaa Talaadadii ku dhawaaqay xabbad-joojin laba toddobaad ah oo loogu talagalay in gogol xaar loogu sameeyo heshiis kama dambeys ah oo lagu soo afjaro dagaalka ay Maraykanka iyo Israa’iil ku qaadeen Iiraan 28-ka Febraayo, kaasoo sababay kumannaan dhimasho iyo dhaawac ah gobolka oo dhan.
Ku dhawaaqistan ayaa timid wax ka yar laba saac ka hor waqtigii kama dambaysta ahaa ee Trump u qabtay Iiraan si ay u furto marin-biyoodka Hormuz una aqbasho heshiis, haddii kale “ilbaxnimo dhan” ay dhiman doonto.
