Ciidamada Israa’iil ayaa Arbacadii duqeeyay koonfurta Beirut, iyagoo beegsaday meel dhowr boqol oo mitir u jirta safaaradda Belgium xilli Wasiirka Arrimaha Dibadda Maxime Prevot uu booqasho ku joogay magaalada isla markaana ku sugnaa dhismaha.
Prevot ayaa ku baaqay in xabbad-joojinta Maraykanka iyo Iiraan dhawaan la gaaray lagu daro Lubnaan, isagoo dalbaday in si degdeg ah loo joojiyo weerarrada.
“Waxaan joogay safaaradda aniga iyo wafdigayga, dhowr boqol oo mitir u jirta halka gantaalladu ku dhaceen. Tani waa inay joogsataa. Xabbad-joojinta u dhexeysa Maraykanka, Israa’iil iyo Iiraan waa inay ku jirtaa Lubnaan!” ayuu ku yiri bartiisa X.
Prevot ayaa ammaanay dalabka Madaxweynaha Lubnaan Joseph Aoun ee ah in la bilaabo wadaxaajoodyo rasmi ah oo lala yeesho Israa’iil si loo gaaro xabbad-joojin, isagoo sheegay in digniin la’aanta weerarrada ka hor ay muujinayso baahida degdegga ah ee lagu ballaarinayo heshiiska.
Wuxuu sidoo kale dib u xaqiijiyay taageerada Belgium ee ay u hayaan hay’adaha Lubnaan iyadoo ay sii kordhayaan khasaaraha rayidka iyo burburka ka dhashay weerarrada Israa’iil.
Xabbad-joojinta
Kadib dhexdhexaadin ay samaysay Pakistan, Madaxweynaha Maraykanka Donald Trump ayaa Talaadadii ku dhawaaqay xabbad-joojin laba toddobaad ah oo lala galay Iiraan, isagoo ku tilmaamay soo jeedin 10 qodob ka kooban mid “la shaqeyn karo.”
Ku dhawaaqistan ayaa timid wax ka yar laba saac ka hor waqtigii kama dambaysta ahaa ee Trump u qabtay Iiraan si ay u furto marin-biyoodka Hormuz una aqbasho heshiis ama ay wajahdo burbur ballaaran.
Khilaafka gobolka ayaa sii xoogeysanayay kadib markii Maraykanka iyo Israa’iil ay weerarro ku qaadeen Iiraan 28-ka Febraayo, taasoo keentay weerarro jawaab ah oo lagu beegsaday Israa’iil iyo dalalka martigeliya ciidamada Maraykanka.
Lubnaan ayaa si rasmi ah ugu lug yeelatay dagaalka Bariga Dhexe 2-da Maarso, kadib markii weerarro Maraykan iyo Israa’iil ay dileen Hoggaamiyihii Sare ee xilligaas Cali Khamenei, taasoo dhalisay in kooxda Shiicada ee Hezbollah ee xiriirka la leh Tehran ay gantaallo ku garaacdo goobaha Israa’iil.
Tan iyo markaas, Israa’iil ayaa xoojisay weerarradeeda ka dhanka ah Lubnaan isla markaana ballaarisay duullaankeeda koonfurta dalka, iyadoo dishay in ka badan 1,530 qof Lubnaan isla markaana barakicisay in ka badan 1 milyan.
