Madaxweynaha Soomaaliya Xasan Sheekh Maxamuud ayaa u hambalyeeyay garsooraha kubadda cagta Cumar Cartan oo taariikh sameeyay kadib markii uu noqday qofkii ugu horreeyay ee Soomaali ah ee loo doorto inuu garsoore ka noqdo ciyaaraha fiinaalka Koobka Adduunka.
Cartan, oo 34 jir ah, ayaa ka mid ahaa 52 garsoore oo FIFA ku dhawaaqday inay ka qeyb qaadan doonaan final-ka bisha Juun iyo Luulyo ee ka dhici doona Kanada, Meksiko iyo Maraykanka.
Madaxweyne Maxamuud ayaa sheegay in Cartan uu sare u qaaday sumcadda Soomaaliya ee masraxa caalamiga ah.
“Waxaan bogaadinayaa dadaalka, xirfadda iyo daacadnimada uu muujiyay garsoore Cumar, maadaama uu noqday astaan dhiirrigelin u ah jiilka cusub ee Soomaalida,” ayuu yiri Maxamuud.
Tani ma aha markii ugu horreysay ee Cartan uu noqdo hormuud taariikhi ah oo ka soo jeeda dal aan weligiis u soo bixin tartan kubadda cagta caalami ah.
Cartan ayaa garsoor ka ahaa horyaalka kubadda cagta Soomaaliya tan iyo markii uu noqday garsoore FIFA ah sanadkii 2018.
Wuxuu calaamad ku reebay markii uu noqday garsoorihii ugu horreeyay ee ku dhashay Soomaaliya ee garsoore ka noqda ciyaar ka tirsan tartanka Champions League ee Xiriirka Kubadda Cagta Afrika (CAF) oo dhexmartay Mamelodi Sundowns iyo Pyramids FC magaalada Qaahira bishii Janaayo 2025.
Garsooraha ragga ugu fiican sannadka
Wuxuu sidoo kale garsoore ka ahaa final-kii Koobka Qaramada Afrika (AFCON) 2023 ee ka dhacay Aljeeriya, waxaana sanadkii 2025 CAF u magacowday garsooraha ragga ugu fiican sanadka.
Si kastaba ha ahaatee, wax door ah kama uusan qaadan final-kii AFCON ee ka dhacay Morocco horraantii sanadkan inkastoo loo xushay inuu ka mid noqdo garsoorayaasha tartanka.
Soomaaliya ayaa weli rajo ka leh inay gaarto Koobka Qaramada Afrika 2027, kadib markii ay Mauritius kaga adkaatay 4-2 rigoorayaal bishii Maarso si ay ugu soo baxdo wareegga group-yada markii ugu horreysay.
Final-ka ayaa markii ugu horreysay si wadajir ah u martigelin doona saddex dal oo Bariga Afrika ah: Kenya, Tansaaniya iyo Uganda.
