Masar ayaa Arbacadii cambaareysay weerarradii ugu dambeeyay ee Israa’iil ku qaaday Lubnaan, iyadoo ku eedeysay inay isku dayayso inay fashiliso dadaallada lagu doonayo in lagu soo celiyo xasilloonida gobolka kadib ku dhawaaqista xabbad-joojinta Maraykanka iyo Iiraan.
Wasaaradda Arrimaha Dibadda ee Masar ayaa bayaan ay soo saartay ku cambaareysay weerarrada Israa’iil ay ku beegsatay aagag ballaaran oo ka tirsan Lubnaan isla markaana ku dishay kuna dhaawacday boqolaal rayid ah.
Wasaaraddu waxay sheegtay in duqeymaha si ula kac ah u beegsadeen xarumo rayid iyo kaabayaasha dhaqaalaha, iyadoo ku tilmaantay xadgudub cad oo ka dhan ah madax-bannaanida Lubnaan iyo jebin muuqata oo sharciga bani’aadannimada caalamiga ah.
Waxay sheegtay in weerarradu ay yimaadeen kadib ku dhawaaqista heshiiska xabbad-joojinta Maraykanka iyo Iiraan isla markaana ay “si buuxda uga hor imaanayaan” jawigii wanaagsanaa ee ka dhashay.
Waxay ku eedeysay Israa’iil inay dooneyso inay wiiqdo dadaallada gobolka iyo kuwa caalamiga ah ee lagu dhimayo xiisadaha laguna horumarinayo wadahadal iyo diblomaasiyad, iyadoo ka digtay in weerarradu ay halis u yihiin inay gobolka u jiidaan fowdo ballaaran.
Qaahira ayaa ku baaqday in dhinacyada gobolka iyo kuwa caalamiga ahi ay si degdeg ah u soo farageliyaan si loo joojiyo waxa ay ku tilmaantay “koror gardarro ah oo halis ah” oo Israa’iil sameyneyso, isla markaana looga hortago in gobolku uu galo rabshado iyo xasillooni darro dheeraad ah.
Wasaaraddu waxay dib u xaqiijisay taageerada buuxda ee Masar ee Lubnaan waxayna carrabka ku adkeysay muhiimadda ay leedahay in la ixtiraamo madax-bannaanida iyo midnimada dhuleed ee Lubnaan.
Ciidanka Israa’iil ayaa Arbacadii qaaday mowjado duqeymo ah oo aan loo meeldayin oo ka dhacay Lubnaan, kuwaas oo dilay ugu yaraan 254 qof isla markaana dhaawacay 1,165 oo qof oo kale, sida ay sheegtay Hay’adda Difaaca Rayidka ee Lubnaan.
Israa’iil ayaa fulinaysay duqeymo cirka ah iyo duullaan dhulka ah oo ka socda koonfurta Lubnaan tan iyo weerar xuduudda ka gudbay oo ay 2-dii Maarso fulisay Xisbullah, inkastoo uu jiray xabbad-joojin dhaqan gashay Noofeembar 2024.
