Agaasimaha Guud ee Wasaaradda Maaliyadda ee Jamhuuriyadda Federaalka Soomaaliya, Dr. Suleymaan Sheekh Cumar, ayaa Talaadadii soo xiray Shirka Isku-duwidda Miisaaniyadda Rubuc-sanadlaha ah oo socday afar maalmood, kaas oo Muqdisho isugu keenay wakiillo ka socday Dowladda Federaalka, Dowlad-goboleedyada xubnaha ka ah Federaalka iyo Maamulka Gobolka Banaadir.
Shirka ayaa diiradda lagu saaray iswaafajinta iyo mideynta habraacyada diyaarinta miisaaniyadda ee Dowladda Federaalka, Dowlad-goboleedyada iyo Maamulka Gobolka Banaadir. Ka qaybgalayaashu waxay sidoo kale ka wada hadleen diyaarinta miisaaniyadda sannadlaha ah ee qaranka iyo hababka lagu xaqiijinayo ka qaybgalka dadweynaha ee geeddi-socodka miisaaniyadda ka hor inta aan loo gudbin Golaha Wasiirrada iyo Baarlamaanka.
Intii uu shirku socday, Guddi-hoosaadka Miisaaniyadda ayaa soo bandhigay warbixinno ku saabsan horumarka la gaaray iyo qorshayaasha shaqo, halka ka qaybgalayaashuna ay dib u eegeen mudnaanta iyo ajandayaasha kulammada soo socda ee lagu xoojinayo maamulka maaliyadda guud iyo hannaanka miisaaniyadda Soomaaliya.
Hadalkiisii xiritaanka, Dr. Suleymaan Sheekh Cumar ayaa ku ammaanay Guddi-hoosaadka Miisaaniyadda dadaalladooda, wuxuuna dib u xaqiijiyey sida ay Wasaaradda Maaliyadda uga go’an tahay xoojinta iskaashiga iyo dhiirrigelinta hannaan mideysan oo loogu diyaariyo miisaaniyadda dhammaan heerarka dowladda.
