Turkiga ayaa Arbacadii beeniyay eedeymo ku faafayay baraha bulshada oo sheegaya in Ankara ay adeegsanayso joogitaankeeda militari ee Soomaaliya si ay saameyn ugu yeelato dhinacyo siyaasadeed oo gaar ah.
Bayaan lagu daabacay barta bulshada Turkiga ee NSosyal, Xarunta La-dagaallanka Wararka Been Abuurka ee Turkiga ayaa ku tilmaantay sheegashooyinkaas “kuwa gebi ahaanba aan sal lahayn.”
Turkiga ayaa sannado badan waday “iskaashi sharci ah oo uu la leeyahay Dowladda Federaalka Soomaaliya si waafaqsan sharciga caalamiga ah, iyadoo ujeeddadu tahay xoojinta amniga, xasilloonida iyo awoodda hay’adaha Soomaaliya,” ayaa lagu yiri bayaanka.
“Joogitaanka militari iyo howlaha tababarka ee Turkiga ee Soomaaliya waxay ku wajahan yihiin dib-u-habeynta Ciidanka Xoogga Dalka Soomaaliyeed, casriyeynta hay’adaha amniga, iyo kor u qaadidda awoodaha la-dagaallanka argagixisada,” ayuu raaciyay bayaanku.
Bayaanka ayaa carrabka ku adkeeyay in ciidamada militariga Turkiga “aysan gabi ahaanba wax lug ah ku lahayn” geeddi-socodka doorashooyinka Soomaaliya ama dhaqdhaqaaqyada siyaasadeed ee gudaha.
Turkiga ayaa sidoo kale dib u xaqiijiyay taageerada uu u hayo sii socoshada nabdoon ee geeddi-socodka dimuqraadiyadda Soomaaliya wuxuuna sheegay inuu si buuxda u ixtiraamayo madaxbannaanida dalka iyo rabitaanka shacabka Soomaaliyeed.
