Ra’iisul Wasaare Ku-xigeenka Jamhuuriyadda Federaalka Soomaaliya, Saalax Axmed Jaamac, ayaa Talaadadii furay kulan wadatashi ah oo ku saabsan Istaraatiijiyadda Qaran ee Isdhexgalka Gobolka, kaas oo diiradda lagu saaray xoojinta isku xirka dhinacyada dhaqaalaha, ganacsiga iyo kaabeyaasha u dhexeeya Soomaaliya iyo dalalka gobolka.

Kulanka ayaa waxaa isugu yimid dhowr wasiir oo ka tirsan Dowladda Federaalka, wakiillo ka socday hay’adaha dowladda iyo khubaro farsamo si ay uga wada hadlaan diyaarinta iyo hirgelinta istaraatiijiyadda qaran.

Ra’iisul Wasaare Ku-xigeenka Saalax ayaa sheegay in Afrika ay u soo ifbaxayso inay noqoto mid ka mid ah suuqyada waaweyn ee dunida, isla markaana ay sii kordhayso xiisaha ay u qabaan dhaqaalaha caalamka. Wuxuu sidoo kale xusay in Soomaaliya ay leedahay awood istaraatiiji ah oo ay ku noqon karto buundo isku xirta Afrika iyo caalamka intiisa kale, taas oo ay suurtagelinayso xeebteeda dheer.

Wuxuu tilmaamay in isdhexgalka dhaqaale ee xaddidan iyo ganacsiga hoose ee ka dhexeeya dalalka Afrika ay yihiin caqabado waaweyn oo horyaalla qaaradda, isaga oo carrabka ku adkeeyey baahida loo qabo in la qaato hannaan ku saleysan xog iyo caddayn si Soomaaliya iyo shacabkeedu uga faa’iidaystaan fursadaha ka dhalanaya isdhexgalka gobolka.

Istaraatiijiyadda Qaran ee Isdhexgalka Gobolka ayaa dejin doonta hannaan ay Soomaaliya uga faa’iidaysanayso marinnadeeda ganacsi, dekedaheeda iyo goobaha xuduudaha la isaga gudbo si loo fududeeyo ganacsiga, loo ballaariyo suuqyada, loo soo jiito maalgashiga, loona xoojiyo isku xirka dhaqaalaha Geeska Afrika, Bariga Afrika iyo guud ahaan qaaradda.