Di presidential candidate of African Democratic Congress, Atiku Abubakar, and im counterpart for Nigeria Democratic Congress, Peter Obi, no show for Monday as opposition parties and presidential candidates open fresh negotiation for Abuja,.

Na about di possibility of bringing one single candidate to face di ruling All Progressives Congress for 2027 presidential election.

Di summit, wey di G-100 political pressure group arrange for Yar'Adua Centre, bring togeda representatives of six opposition parties — di ADC, Allied Peoples Movement, NDC, Peoples Democratic Party, Peoples Redemption Party and Social Democratic Party.

Among di people wey show be di PRP presidential candidate, Donald Duke; SDP presidential candidate, Adewale Adebayo; Democratic Leadership Alliance candidate, Moses Olusoji; and APM vice-presidential candidate, Lawan Daura, togeda wit oda party leaders and stakeholders.

Nobody explain why Atiku and Obi no show for di meeting. But one source wey know wetin dey happen talk say di two big opposition figures dey monitor di process well-well, and dem fit take position after dem don assess di framework wey di G-100 organisers dey develop.

Di source, wey talk without givin im name becos e no get permission to talk on di matter, say di way G-100 come up after di various parties don already pick their presidential candidates fit make di negotiation tough.

“While di goal of G-100 good, Atiku fit dey think say dem start late. E support any legitimate strategy to remove di APC-led government, but di fact say di group come up afta di parties don already choose dia presidential candidates no make di work easy,” e talk.