Di United States don deliver military equipment to di Nigerian Air Force for Lagos and Kainji, Niger state.

US Africa Command (AFRICOM) on top dia website on Thursday talk say dem deliver di equipment for September through di US Air Force C-17.

Di command talk say "di equipment delivery na part of a foreign military sales agreement between di US and Nigerian militaries".

"Di delivery dey push di strategic partnership between di two nations so dat e go boost Nigerian-led efforts to fight terrorism for di region. US military support to di Armed Forces of Nigeria na by dia invitation and e dey based on respect for Nigerian sovereignty," di command talk.

Last month, Dagvin Anderson, di AFRICOM commander, announce say di US don pull back plenty of dia troops for Nigeria after di May operation wey kill Abu-Bilal al-Minuki, di second-in-command of ISIS, for di Lake Chad Basin.

American and Nigerian officials talk say di small deployment to di West African nation get big results.