Sub-Saharan Africa go become di biggest source of new workers for di whole world for di next 25 years, with more than 620 million people wey go join di region's working-age population by 2050, according to World Bank.

Dis change for population go make Africa dey centre of global labour market as oda regions dey get old people and dia workforce dey reduce.

World Bank estimate say SSA population go rise from about 1.5 billion for 2024 to 2.5 billion by 2050, with more than 600 million extra people wey go enter di working-age population.

But dis big population growth for Africa come with big economic test, analysts say. To create enough jobs wey go fit absorb millions of new workers evri year still dey be challenge.

World Bank estimate say SSA go need to create average of 25 million jobs evri year until 2050 so dat e go match di growth of working-age population.

Dat requirement hard well well becos economic growth for di region no dey create jobs fast enough to match di rise for labour force.

So di institution don advise African countries to pursue more productive, diversified and private-sector-led growth, with support from investment for infrastructure, skills, and institutions wey go reduce cost of doing business.

World Bank don identify infrastructure and energy, agriculture and agribusiness, healthcare, tourism, and value-added manufacturing as areas wey get strong potential to generate plenty jobs.

To unlock dat potential, e no be only government money wey go do am. More private-sector investment, better infrastructure and stronger business environment go dey key to help companies expand production and employment, World Bank talk.

Skills development go also dey important as African economies dey enter changing global supply chains and new industries, e add.

For Nigeria, dis population change dey important well well. As Africa's most populous country, di fast-growing workforce fit become major source of economic growth if enough productive jobs dey create.

But without faster job creation, di same population growth fit make unemployment, underemployment and pressure on family income worse.