A maraicen Asabar, 14 ga Nuwamba, tawagar Portugal ta shirya karramawar bazata ga tsohon kyaftin ɗinta, Cristiano Ronaldo, wanda ya yi ritaya daga buga mata wasa a farkon Nuwamban nan.

‘Yanwasan tawagar za su fito da riga mai lamba 7 yayin shirin buga wasan da za su yi da Denmark a gasar Nations League. Sannan a minti 7 na wasan, za a dakata don karrama Ronaldo, a wani shiri da Hukumar ƙwallo ta Turai, UEFA ta amince.

Haka nan za a bar ɗakin ‘yanwasa mai lamba 7, inda Ronaldo ya saba zama ba kowa a ciki, domin ba wa ‘yan tawagar damar jimamin rashin gwarzon ɗanƙwallon a tawagarsu.

Rahotanni sun ce Ronaldo bai shirya halartar wasan ba, bayan da a baya ya ƙi amsa tayin buga wasan bankwana da tawagar ƙasar tasa, wanda hukumar ƙwallon ƙasar ta yi masa.

Ronaldo ya fara buga wa ƙasarsa wasa a Agustan 2003, inda ya kwashe shekaru 23 yana nemowa ƙasar suna, inda ya lashe kofin Nations League sau biyu, da kofin Euro guda.

Tsawon zamaninsa, Ronaldo ya buga wasanni 234 kuma ya ci ƙwallo 146, tare da kafa tarihin cin adadi mafi girma da wani ɗanwasa ya taɓa ciyowa ƙasarsa a tarihin ƙwallon ƙafa a duniya.

Sai dai tafiyarsa daga Portugal ba ta zo da daɗin rai ba, sakamakon taƙaddamar da ya samu da kocin tawagar, Jorge Jesus, kan ƙin sanya shi a wasa.

Ronaldo yana ci gaba da buga ƙwallo a ƙungiyar Al-Nassr ta Saudiyya, inda yake fatan cika burinsa na zura ƙwallaye 1,000 a rayuwarsa, inda a yanzu ya ci jimillar ƙwallo fiye da 985.