A wata alama mai nuna cewa tawagar ƙwallon ƙafa ta Iran ba ta janye daga gasar Kofin Duniya da za a yi a bana ba, ƙungiyar ta buga wasan sada zumunta da Nijeriya a Turkiyya.
Wasan ya gudana a birnin Antalya na Turkiyya, bayan da rikicin Gabas ta Tsakiya ya tilasta sauya wurin buga wasan daga Jordan zuwa Turkiyya.
Tawagar ta Iran ta kara da tawagar Nijeriya, inda ta sha kaye da ci 1-2 a hannun Super Eagles, wadda ba ta samu cancantar zuwa gasar Kofin Duniya ta FIFA 2026 da za a yi a watan Yuni mai zuwa ba.
Super Eagles, wadda koci Eric Chelle ke jan ragama, ta samu nasarar zura ƙwallon farko ta hannun Moses Simon tun a minti na 6, sai ƙwallo ta biyu ta hannun Akor Adams a minti na 51.
Adams, wanda ke buga wa Sevilla, ya hau lambar tauraron ɗanwasan Nijeriya wanda ke buga wa ƙungiyar Galatasaray ta Turkiyya, wato Victor Osimhen, wanda bai samu buga wasan ba sakamakon jinya.
A ɓangaren Iran, ɗanwasanta mai buga wa ƙungiyar Olympiacos ta Girka, Mehdi Taremi ya ci ƙwallo guda a minti na 67.
A tawagar Nijeriya, babban golanta Stanley Nwabali bai buga wasan ba saboda a halin yanzu ba shi da kulob. Don haka Maduka Okoye ne ya tsare raga a wasan.
Tun gabanin wasan, shi ma Calvin Bassey ya janye daga tawagar saboda damuwa kan raunin da yake da shi, inda Chibuike Nwaiwu na ƙungiyar Fulham ya maye gurbinsa.
Wasan sada zumuntar ya nuna cewa Iran tana ci gaba da shirye-shiryen gasar Kofin Duniya da za a yi a Amurka, Canada, da Mexico. Ita kuwa Nijeriya ba ta cancanci zuwa gasar ba.
