Miaka 61 ya utawala wa Baath wafikia kikomo.
Miaka 61 ya utawala wa Chama cha Baath nchini Syria, ulioanza mwaka 1963 kwa mapinduzi, umemalizika huku vikosi vya upinzani vikiudhibiti mji mkuu Damascus.
Chama cha Arab Socialist Baath Party kiliingia madarakani kupitia mapinduzi Machi 1963. Mnamo 1970, Hafez al-Assad, baba wa mtawala wa hivi karibuni zaidi wa Syria Bashar al-Assad, aliimarisha mamlaka kupitia mapinduzi ya ndani ya chama na kushika urais mwaka wa 1971.
Bashar al-Assad alimrithi babake baada ya kufariki mwaka 2000, akiendelea na utawala wa Baath Party.
Huku kukiwa na uvumi kwamba Assad alikimbia Damascus kwa ndege kuelekea mji wa Homs, hatma yake ya sasa na aliko haijulikani.
Upinzani wa Syria umetangaza katika taarifa yake kwa njia ya televisheni kwamba wamekomboa Damascus na kuupindua utawala wa miaka 24 wa Rais Bashar al Assad, na kuongeza kuwa wafungwa wote wameachiliwa huru.
Upinzani ulisema "umemng'oa 'mbabe' Bashar al-Assad."
Waandamanaji waliibuka dhidi ya serikali mwishoni mwa Jumamosi katika vitongoji vya Damascus, wakati vikosi vya serikali vilijiondoa kutoka kwa maeneo muhimu kama vile wizara ya ulinzi, wizara ya mambo ya ndani na uwanja wa ndege wa kimataifa.
Kwa kuingia kwa waandamanaji katika maeneo muhimu, serikali ilikuwa imepoteza udhibiti wake mwingi juu ya mji mkuu.
Wafungwa katika Gereza la Sednaya mjini Damascus, linalojulikana kwa ushirikiano wake na utawala na vitendo vya utesaji, waliachiliwa huru na waandamanaji waliovamia kituo hicho.
Vikosi vya upinzani vilikuwa vimedhibiti sehemu kubwa ya katikati mwa jiji la Aleppo na kuanzisha utawala katika jimbo lote la Idlib kufikia tarehe 30 Novemba.
Kufuatia makabiliano makali siku ya Alhamisi, makundi ya upinzani yalichukua udhibiti wa kituo cha mji wa Hama kutoka kwa vikosi vya serikali.
Makundi yanayopinga utawala yaliteka makaazi kadhaa katika mkoa muhimu wa kimkakati wa Homs na kuanza kusonga mbele kuelekea mji mkuu wa Syria.
Siku ya Ijumaa, makundi ya upinzani ya Syria yalichukua udhibiti wa Daraa kusini mwa Syria karibu na mpaka wa Jordan.
Mapema siku ya Jumamosi, walichukua udhibiti wa mkoa wa Suwayda kusini na vikosi vya upinzani vya eneo la Quneitra vilipata udhibiti wa mji mkuu wa mkoa huo.
