Uturuki itahakikisha usalama nje ya mipaka yake ya kusini na kuondoa vitisho vya ugaidi vinavyotoka katika maeneo hayo kuanzia 2025, Rais Recep Tayyip Erdogan amesema.
Akizungumza katika Kongamano la Nane la Chama cha AK katika jimbo la Balikesir, Erdogan alisema: "Kuanzia 2025, tutahakikisha usalama nje ya mipaka yetu ya kusini, hasa kuhusu suala la ugaidi, na kuondoa vitisho vinavyotokana na maeneo hayo."
Erdogan alisema amedhamiria kuleta Uturuki karibu na malengo ya "Karne ya Uturuki," katika kila nyanja ikiwa ni pamoja na mchango wa kumaliza vita vya "kaskazini", kufikia mafanikio katika mpango wake wa kiuchumi, kupiga hatua katika maeneo kama vile sekta ya ulinzi, teknolojia ya juu, akili mnemba, na vyanzo vya nishati ambavyo vitaondoa utegemezi wa rasilimali za kigeni.
Kuhusu kuanguka kwa utawala wa Assad nchini Syria, Erdogan alisema Uturuki "ilidumisha udugu," iliwasaidia waliokandamizwa, "na kwa mara nyingine tena, tuliibuka washindi."
Rais Erdogan alisema mzozo wa miaka 13 wa kibinadamu na miaka 61 ya "ukandamizaji" wa Wabaath nchini Syria ulimalizika na mapinduzi yaliyoanzishwa na watu wa Syria katika wiki za hivi karibuni, ambayo yalisababisha ushindi wa haraka.
Uturuki iliwakaribisha Wasyria milioni 3.6 na kuhakikisha usalama wa watu wengine milioni 4 nje ya mipaka yake wakati wa mzozo wa kibinadamu nchini Syria, rais wa Uturuki alisema. "Tulifaulu mtihani wa ubinadamu kwa mafanikio makubwa."
