Raia wawili wa Marekani wanaokabiliwa na kesi katika Jamhuri ya Kidemokrasia ya Kongo kuhusu jukumu lao katika jaribio la mapinduzi mwezi Mei, waliiambia mahakama siku ya Ijumaa kwamba walitishiwa na kiongozi huyo wa mapinduzi ama kujiunga au kuuawa.
Watu wenye silaha walikalia kwa muda ofisi ya rais katika mji mkuu Kinshasa mnamo Mei 19 kabla ya kiongozi wao, mwanasiasa wa Kongo anayeishi Marekani Christian Malanga, kuuawa na vikosi vya usalama.
Wakizungumza kwa mara ya kwanza tangu kesi hiyo kuanza kusikilizwa, mtoto wa kiume wa Malanga Marcel Malanga, 22, na Benjamin Zalman-Polun waliiambia mahakama kuwa kiongozi wa mapinduzi aliwatishia.
"Baba alikuwa ametishia kutuua ikiwa hatutafuata maagizo yake," Malanga aliiambia mahakama ya kijeshi, akikana kuwa hawakuhusika katika kupanga jaribio la mapinduzi.
Alisema alikuja Congo kumuona baba yake ambaye hajawahi kuonana naye tangu mwaka 2021, kwa mwaliko wake na kuongeza kuwa hakuwahi kutembelea nchi hiyo hapo awali.
"Mimi ni Mmarekani, sizungumzi Kifaransa au Kilingala," aliiambia mahakama ya kijeshi katika mji mkuu Kinshasa.
Malanga na Zalman-Polun ni miongoni mwa watu zaidi ya 50 ambao ni pamoja na raia wa Marekani, Uingereza, Kanada, Ubelgiji na Congo wanaokabiliwa na kesi kufuatia mapinduzi yaliyoshindwa.
Wanakabiliwa na mashtaka mbalimbali ikiwa ni pamoja na kumiliki silaha kinyume cha sheria, kula njama ya uhalifu, na ugaidi, majaribio ya kuvuruga taasisi za serikali na kudhoofisha uadilifu wa serikali, ambayo baadhi yao huhatarisha adhabu ya kifo au kifungo cha muda mrefu gerezani.
Zalman-Polun aliiambia mahakama kuwa alikuwa mfanyabiashara wa muda mrefu wa Malanga, lakini hakuhusika kamwe katika kupanga jaribio la mapinduzi.
"Nilikutana na Malanga mwaka wa 2013, kila mara tulikuwa na uhusiano kulingana na shughuli za uchimbaji madini nchini Swaziland na Msumbiji, hajawahi kuwa na vurugu kiasi hicho," Zalman-Polun aliiambia mahakama.
Kesi hiyo iliahirishwa hadi Jumatatu Julai 8.
