Takriban madaktari 28 waliokuwa kazini wameuawa katika muda wa saa 24 zilizopita nchini Lebanon, ambapo Israeli imeanzisha mashambulizi na kutuma wanajeshi, mkuu wa Shirika la Afya Duniani alisema.
"Wahudumu wengi (wengine) wa afya hawaripoti kazini na walikimbia maeneo wanayofanyia kazi kutokana na milipuko ya mabomu," Mkurugenzi Mkuu Tedros Adhanom Ghebreyesus aliambia mkutano na waandishi wa habari wa mtandaoni siku ya Alhamisi, akitaka ulinzi mkali zaidi kwa wafanyikazi wa afya.
"Hii inazuia kwa kiasi kikubwa utoaji wa huduma wa afya kwa majeruhi wa halaiki," alisema.
Mwakilishi wa WHO nchini Lebanon Dk Abdinasir Abubakar aliambia mkutano huo kwamba wahudumu wote wa afya waliouawa siku iliyopita walikuwa kazini, wakiwasaidia waliojeruhiwa.
Jumla ya karibu watu 2,000 wameuawa, wakiwemo watoto 127, na 9,384 kujeruhiwa tangu kuanza kwa mashambulizi ya Israeli dhidi ya Lebanon katika mwaka jana, Wizara ya Afya ya nchi hiyo ilisema. WHO ilisema hii inajumuisha wafanyikazi 73 wa afya.
"Hospitali tayari zimehamishwa. Nadhani ninachoweza kusema kwa sasa ni uwezo wa usimamizi wa majeruhi wengi upo, lakini ni suala la muda tu hadi uwezo huo ufikie kikomo chake," Abubakar wa WHO alisema.
Wakala wa afya ulimwenguni hautaweza kupeleka shehena kubwa iliyopangwa ya vifaa vya matibabu nchini siku ya Ijumaa kwa sababu ya vizuizi vya ndege, Tedros alisema katika mkutano huo huo.
Kuongezeka kwa mvutano katika Mashariki ya Kati kumesababisha machafuko ya usafiri wa anga, huku mashirika ya ndege ya kimataifa yakigeuza au kusitisha safari za ndege na kuripotiwa ucheleweshaji wa muda mrefu katika viwanja vya ndege vya kanda.
Abubakar wa WHO alisema shirika hilo linajadiliana na nchi kuwezesha uwasilishaji wa vifaa vya dharura nchini Lebanon na kutafuta njia zingine, ikiwa pamoja na nji ya bahari au barabara.
