Jeshi la Nigeria limekanusha ripoti kuwa walinzi wa rais wa nchi hiyo wamewekwa katika hali ya tahadhari kutokana na madai ya njama ya mapinduzi dhidi ya Rais Bola Tinubu.
Makao Makuu ya Ulinzi ya Nigeria yamelaani vikali ''tuhuma za njama ya mapinduzi'' kuwa ''njama mbaya na zisizo na msingi.''
Hasa ilikanusha makala katika moja ya majukwaa makubwa ya habari ya mtandaoni ikidai kwamba, walinzi wa rais wanaojulikana kama Guards Brigade walikuwa wamewekwa katika hali ya tahadhari kufuatia mienendo isiyo ya kawaida.
''Makao Makuu ya Ulinzi yanataka kueleza wazi kwamba madai hayo ni ya uongo kabisa,'' iliongeza katika taarifa yake Jumapili.
Wimbi la Mapinduzi
Jeshi la Nigeria limeapa ''kuchukua hatua zinazofaa'' dhidi ya vyombo vya habari kwa sababu chapisho hilo lilikuwa na ''nia ya ndani ya kuleta mvutano usio wa lazima nchini humo.''
Hii si mara ya kwanza kwa jeshi la Nigeria kujitokeza kusisitiza dhamira yake ya kutetea demokrasia ya nchi hiyo huku Afrika Magharibi ikikabiliana na wimbi la mapinduzi.
Tangu 2020, mapinduzi kadhaa ya kijeshi yamefanyika nchini Mali, Niger, Burkina Faso na Guinea katika Afrika Magharibi na pia katika taifa la Afrika ya Kati la Gabon. Nchi hizi zote kwa sasa zinaongozwa na juntas.
