Jamhuri ya Kidemokrasia ya Congo, DRC imezindua mpango wa kuunda hifadhi kubwa zaidi ya misitu ya kitropiki duniani katika Bonde la Congo.
Misitu hiyo itakuwa katika ukanda wa kijani kibichi kati ya mkoa wa mashariki wa Kivu na mji mkuu wa Kinshasa, Rais Felix Tshisekedi alisema Jumatano katika hotuba yake katika Kongamano la Kiuchumi la Dunia.
Bonde la Congo limeenea katika nchi sita - Cameroon, Jamhuri ya Afrika ya Kati, Jamhuri ya Kidemokrasia ya Congo (DRC), Congo Brazzaville, Equatorial Guinea na Gabon.
"Takriban 60% ya misitu iko katika Jamhuri ya Kidemokrasia ya Congo. Hifadhi hiyo iliyopendekezwa itakuwa na urefu wa zaidi ya kilomita 2,400 (maili 1,500), ikiunganisha Hifadhi ya Kitaifa ya Virunga mashariki mwa Congo, misitu iliyopanuka ya Ituri na Mto Congo kutoka Kisangani hadi Kinshasa," Rais Tshisekedi alisema.
Amani ya kudumu
"Mpango huu unaenda mbali zaidi ya uhifadhi wa mazingira. Unawakilisha mkakati mpana wa kufufua uchumi wetu, kuimarisha jamii zetu na kuendeleza amani ya kudumu katika majimbo yetu ya mashariki ambayo yameathiriwa kwa muda mrefu na migogoro ya silaha na ukosefu wa utulivu,” alisema.
Bonde la Congo limekuwa katika tishio kutokana na mzozo wa mashariki mwa Congo, ambao unachangia kwa kiasi kikubwa uharibifu wa misitu. Kinshasa inataka kupunguza kiwango cha kaboni wakati ikibadilisha uchumi kwa kutumia nishati ya jua, umeme wa maji na nishati ya upepo.
Ukanda wa kijani wa Kivu-Kinshasa - unaochukua zaidi ya kilomita za mraba 500,000 na makazi ya watu milioni 31 unatarajiwa kuhifadhi zaidi ya kilomita za mraba 100,000 za misitu ya asili.
Inakadiriwa kuunda takriban ajira 500,000 na kutoa tani milioni 1 za chakula kwa mwaka kwa Kinshasa, jiji kubwa zaidi barani Afrika.
