Rais wa Burundi Evariste Ndayishimiye amemsamehe mwandishi wa habari aliyekuwa akitumikia kifungo cha miaka 10 jela kwa "kuhatarisha uadilifu wa eneo la taifa."
Floriane Irangabiye "anafaidika na msamaha kamili wa hukumu," ilisoma taarifa kutoka Ofisi ya Rais ya Agosti 14.
Taarifa hiyo ilisema Irangabiye, ambaye alikuwa katika gereza la Bujumbura, aliomba msamaha.
Floriane alizaliwa na kukulia nchini Burundi, lakini alihamia Rwanda zaidi ya miaka 10 iliyopita.
Floriane Irangabiye ni mwandishi wa habari na mama wa watoto wawili. Mnamo Agosti 2022, ulimwengu wake ulipinduliwa alipokamatwa katika ziara ya kifamilia nchini Burundi.
Ilikuwa safari ya kwanza kuitembelea familia yake nchini Burundi tangu 2015, wakati ambapo Warundi walifanya maandamano wakipinga uamuzi wa rais huyo wa zamani kuamua kugombea muhula wa tatu.
Januari 2, 2023, alihukumiwa kifungo cha miaka 10 jela.
Wakati wa kukamatwa kwake, alikuwa akiendesha kipindi mara kwa mara katika kituo cha redio cha mtandaoni cha Burundi kiitwacho Radio Igicaniro.
Wakati wa kesi yake, mwendesha mashtaka aliwasilisha maoni yaliyotolewa wakati wa utangazaji wa kipindi ambapo Floriane na wageni wake wakiikosoa serikali ya Burundi.
